Во Гевгелија, Дојран, Валандово и Конче со над 370 илјади евра ќе се збогатува туристичката понуда

1614

Околу 23 милиони денари или нешто повеќе од 370 илјади евра ќе се инвестираат во општините Гевгелија, Дојран, Валдново и Конче во рамките на проектот ,,Збогатување на туристичката понуда во Југоисточниот плански регион’’ што ќе се имплементира преку Центарот за развој на Југоисточниот плански регион. За овој проект во кој партиципираат четири општини од Бирото за регионален развој се обезбедени 17,9 милиони денари додека останатиот дел ќе биде учество на самите општини

,,Со овој проект населението од Југоисточниот плански регион,  домашните и странските туристи ќе имаат на располагање нови туристички понуди, со што се отвара можност за зголемување на посетите во регионот посебно за рекреација, излет, духовно исполнување и уживање во природните убавини, што ќе придонесе до поголем економски развој на општините Валандово, Гевгелија, Дојран и Конче, а со самото тоа и економски развој на регионо,, се наведува во информацијата од Центарот за развој на Југоисточниот плански регион

Во Општина Гевгелија ќе се врши доизградба на локалниот пат до населеното место Ума во должина од 782,14 метри со кој ќе се овозможи ревитализација на селото, изградба, доградување и доопремување на нови куќи во селото што ќе придонесе кон развој на планинскиот пограничен регион во општината, а ќе се отворат и можности за развој на планинскиот и ловниот туризам.

Во Општина Дојран ќе се изгради пешачка патека во должина од 760 метри која води кон граничниот премин во Стар Дојран. Трасата која води до граничниот премин  е обрасната со трева со многу нерамнини, насипи од земја, шут и истата е запуштена и нефункционална. Се планира и уредување на зелен појас

Во Општина Валандово се предвидува уредување на патеката од манастирот Св.Горѓи до Исар кулата во должина од 700 метри, поставување на урбана опрема, клупи и патокази долж целата патека, осветлување на патеката и Кулата и поставување на телескоп за набљудување. Целта на овој проект е да привлече што повеќе гости и посетители до овој археолошки локалитет до кого нема соодветна инфраструктура

Во Општина Конче се планирани активности за доизградба на конакот во дворот на манастирската Црква Св. Стефан во Конче, негово опремување, како и поплочување на дел од просторот околу манастирот, кои се од исклучително значење и ќе придонесат кон развој на селскиот и манастирскиот туризам во Општина  Конче.  Манастирската црква Св. Стефан во Конче  потекнува од 13 век  има исклучителна историска и архитектонска вредност и изобилува со исклучителен фрескоживопис и ставена е под заштита на културното наследство на државата и е атрактивен за посетители

Пред Нова година градоначалниците од овие четири општини ги потпишаа договорите со Центарот за развој на Југоисточниот плански регион

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.