Ја вративме вербата дека нашите претставници може да бидат главни конкуренти на Евровизија – вели Јанева за успехот во Тел Авив

3258

Како го виде годинашново издание на Евровизија?

Евровизија, тимот и целото незаборавно патување ми го променија животот и со сигурност ми го продолжија со 24-часовно смеење. Сфатив зошто Евровизија е сон на секој пејач. Воодушевена сум од целата организација. Koмпанијата која го продуцираше годинашното издание на Евровизија со целиот огромен технички тим покажаа високо ниво на професионална подготвеност и не оставија никаков простор за несигурност на нашата екипа. За време на нашиот двенеделен престој во Тел Авив присуствувавме на многу прес-конференции, проби, делегатски средби и настани организирани од ЕБУ. Беспрекорното шоу кое го гледаше публиката се должи на бројни целодневни проби, анализа на сите детали и совршена комуникација меѓу продукцијата и евровизиските тимови.

Како беше на финалето кога среде песна ракоплескаа?

На настапот на втората полуфинална вечер видовме дека најголемо воодушевување кај публиката предизвикува инструменталната пауза на која се прикажуваа емотивните и внимателно одбрани фото-приказни. На наше огромно изненадување, настапот на финалето беше проследен со овации од почеток до крај. Тоа беше голем доказ дека сите уживаат во изведбата и прв показател дека постојат реални шанси за добар пласман.

Коментар за бодовите од жиритo и публиката, каква беше атмосферата зад сцена.

Иако бевме сигурни во моќта на песната, вокалот и приказната, бевме свесни дека силната конкуренција ќе направи нашата земја тешко да стигне до повисоки бодови од телевоутингот. Можеби домашната публика која навиваше за нас доби впечаток дека жирито оцени поправедно за разлика од евровизиските фанови. Со „Proud“ мислам дека успеавме да ја најдеме формулата за успех кај жирито. Еден од највлијателните фактори кај  нив беше точна и емотивна изведба. Затоа, во иднина, нашите претставници и нивните тимови треба да поработат на анимирање на евровизиските гласачи. Секогаш има простор за подобрување. Ако успееме да направиме средина од жирито и публиката, тогаш и пласманот ќе биде уште повисок! Гласовите и високите бодови ги дочекавме буквално во шок! Камерите и фотографиите ја доловија нашата искрена радост кога се редеа 12-ките. Високите оценки од жирито ги сфативме како директно признание за добро завршена тимска работа.  Многу сум среќна што бев дел од тим кој функционираше беспрекорно, секој со максимална посветеност и одговорност за улогата која ја има. Дел од евровизискиот тим има долгогодишно искуство со мали очекувања и драго ми е што им ја вративме вербата дека нашите претставници може да бидат главни конкуренти.

Дали Александра сака да биде дел од Евровизија догодина?

 Моето прво искуство со Евровизија не можеше да биде посовршено. Секој пејач кој сериозно се бави со музика во нашата земја со добар тим околу него треба да прифати да биде дел од Евровизија. Од една страна, Тамара постави високи стандарди и после неа задачата за идните претставници ќе биде многу тешка. Од друга страна пак, направи пат и добра промоција на македонската музика на таа сцена. Ако прашањето е дали сум подготвена да ја преземам таа одговорност, одговорот е да!

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.