Сите 13 парцели за домување што беа понудени од општина Струмица кои се наоѓаат на влезот во градот од кај Радовиш се продадени, дознава Дрнка МК. На неодамнешното јавно наддавање се јавиле голем број физички и правни лица со намера да добијат парцела во областа Балабаница или парцели во Блок 41/1 каде веќе почнаа да се градат објекти за домување.
Како што е познато Општина Струмица во јуни распиша јавен повик за продажба на парцели. Јавното надавање почна со евро од метар квадратен но за одредени парцели како што дознава Дрнка МК завчера цената достигнала и до 100 евра за квадратен метар. Дел од учесниците не информираа дека за разлика од ланското наддавање за парцели исто така од овој урбан блок, цените за метар квадратен во просек скокнале за околу 20 насто.
Од општина Струмица потврдија дека сите парцели се продадени и во тек е административната постапка на отуѓување на истите . Не информираа дека просечната откупна цена по метар квадратен за 13 парцели на Балабаница што беа понудени достигнала приближно 80 евра за квадратен метар. Лани на јавното наддавање просечната откупна цена беше 64 евра.
Парцелите за домување се со површина од 382 до 734 квадратни метри. Тоа се парцели за станбена куќа која треба да биде висока максимум 8,5 метра со каректеристика ( П+1+ПК – приземје кат и поткровје). (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
