Еколошкото друштво „Калинка” –Валандово достави официјални забелешки на Нацрт – Просторниот план на Република Северна Македонија 2040, со кои бара Казан Дол целосно да биде избришан од текстуалниот и графичкиот дел на Планот и да не остане предвиден како постоен, планиран или потенцијален рударски локалитет.
Според нив причината е јасна: концесијата за Казан Дол е раскината, проектот има своја правна и арбитражна историја, Концесијата за Казан Дол е раскината.Правните последици од овој проект беа предмет и на меѓународна арбитражна постапка, во која инвеститорот бараше надомест од државата, а Република Северна Македонија не беше задолжена да ја исплати бараната отштета.(Арбитражна одлука бр.АРБ.19/9) а и граѓаните од овој дел на Македонија уште во 2017 година јасно го отворија прашањето за својата иднина преку граѓански иницијативи и референдуми во Валандово, Богданци, Дојран и Гевгелија.
Особено загрижува она што експлицитно е запишано на страница 52 од Нацрт-просторниот план. За Казан Дол се наведува дека рудникот „сеуште не е активен”, но веднаш потоа се констатира дека има„поволни геолошки, рударски и геоморфолошки услови за отворање на рударски капацитет во планскиот период”.
На страница 187, Казан Дол повторно се појавува меѓу рудниците на метали.
Оттука, не станува збор само за евидентирање дека на ова подрачје постојат минерални суровини. Самиот текст на Нацртот остава отворена перспектива за отворање рударски капацитет во периодот за кој се носи Просторниот план.
„Од една страна, Југоистокот се определува како еден од најзначајните аграрно-продуктивни простори во државата, кој создава околу 29% од земјоделската бруто-додаде навредност, а Планот бара строга заштита на земјоделското земјиште од загадување и деградација. Од друга страна, во истиот документ повторно се отвора перспектива за металично рударство, вклучително и Казан Дол. Не може државата истиот простор да го определува како стратешки земјоделски регион, простор на органско производство, производство на храна, чисти води, туризам и природни богатства, а истовремено да остава отворена перспектива за металично рударство без јасно разрешување на овие спротивставени намени.“, стои во соопштението на ЕД Калинка
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
