Општина Дојран минатиот месец објави тендер за ангажирање фирма за чистење на крајбрежјето на Дојранското езеро кое треба да се реализира во наредните 3 месеци. До 12 ти март е рокот за доставување на понудите од страна на фирмите кои треба да имат Лиценца Б за изведба на градби од втора категорија издадена од Министерството за транспорт и врски и Б интегрирана еколошка дозвола согласно законот за животна средина.
Според огласот за јавна набавка, заинтересираните фирми треба да имаат во последните три години минимален просечен приход од 10 милиони денари а во техничката и професионална способност, освен стручни кадри, треба да имаат минимум два пловни багери –дрегери , минимум три багери утоварувачи и камиони за транспорт но и во последните 5 години да има најмалку еден договор за изведба на градежни работи со вредност од милион евра.
Според приложената техничка спецификација на објавениот тендер ќе се работи на крајбрежје од 150 илјади метри квадратни со поставување на пловни рефулерни платформи каде ќе работат багерите дрегери, кои пак на дрвена касета на крајбрежјето ќе ја депонираат дел од тињата за транспорт до депонија и дел од песокта која ќе се користи за моделирање на плажите. Ќе се рефулира тиња и песок од дното на езерото од почетната точка на плажите до далечина од 100 метри во езерото.. Паралелно се планира отстранување на суви дрвја и корени, кратење и остранување на треви и трски од 500 метри квадратни на оние места кои е дозволено остранување.
Дека ќе се чисти крајбрежјето на Дојранското езеро ни потврди и градоначалникот Анго Ангов кој подвлече дека деновиве ќе се знае која фирма ќе работи пролетва оти до петок тече огласот. Според него значително ќе се подобри квалитетот на водата во езерото, крајбрежјето но и плажите во пресрет на новата сезона со ова акција. Парите се обезбедени од Владата која за Дојранското езеро одобри околу милион евра за подобрување на состојбите. Тендерот за чистење на крајбрежјето на Дојранското езеро ќе го добие онаа фирма која на распишаниот оглас за јавна набавка ке понуди најниска цена.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
