Масовно се сече шумата над Радовиш, Конзулов побара повеќе контроли од шумската полиција и од чуварите на ШС Плачковица

2344

За време на полицискиот час викендов биле исечени речиси сите дрвја околу бунарите на водоводот за Радовиш, што се наоѓаат на планината Плачковица. Реагираше првиот човек на Општината, Герасим Конзулов, кој јавно ги повика шумската полиција и радовишката подружница на Македонски шуми да излезат на терен и ги засилат контролите. Според Конзулов, во овој период сѐ почести биле реакциите на радовишани дека бесправно се сече и уништува шумскиот фонд на Плачковица.

„Апелирам до шумската полиција и до ЈП Македонски шуми со присуство и контроли на терен да ги спречат сите кои бесправно сечат. Ако имаат потреба, можат да побараат асистенција и од полицијата. Голем број граѓани реагираа до нас како општина дека за време на продолжениот полициски час со запрежни коли се симнува огревно дрво во Радовиш. Испосечени се дрвјата околу бунарите и ако продолжи така, под опасност ќе биде водоснабдувањето на Радовиш. Еве предлагам да се формират екипи кои ќе патролираат на сите патишта кои од Плачковица водат кон Радовиш. Ако се сака може да се интервенира и да се сторибра нелегалната сеча, проблем што не е нов и досега честопати сме разговарале на таа тема. Потребно е акција“, ни изјави градоначалникот на Радовиш, Герасим Конзулов.

Од радовишката шумско-полициска станица тврдат дека нивни екипи согласно ресурсите и капацитетите постојано се на терен и вршат контроли, пред сѐ, на патиштата по кои се носат бесправно сечените дрвја. Во изминатиот период, за време на полициски час против три лица имаат поднесено и прекршочни пријави. Дека се засилени контролите на терен тврдат и од радовишката подружница на Македонски шуми. Таму во март биле фатени околу 20 дрвокрадци.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.