По седумгодишна пауза, ФК Василево повторно се враќа на фудбалските терени, а камбекот го одбележа со победа. Во првото коло од лигата на ОФС Струмица, Василево ја совлада Струмешница од Зубово со резултат 4:2. Станува збор за официјалното натпреварување под покровителство на Општинскиот фудбалски сојуз – Струмица, кое претставува почетно скалило за фудбалските клубови на патот кон повисоките лиги. Во конкуренција од вкупно 14 екипи од струмичко-радовишкиот регион, по речиси една деценија и Општина Василево повторно има свој претставник.
ФК Василево е добро познат клуб на фудбалската јавност. Во минатото се натпреваруваше и во Третата лига, а од неговите редови произлегоа повеќе квалитетни фудбалери. Иако сезоната во лигата на ОФС Струмица штотуку започна, од клубот отворено ги најавуваат своите амбиции – освојување на првото место, пласман во Третата лига и повторно враќање на публиката на трибините. Воедно, целта е Василево да прерасне во центар за развој на младите фудбалери од општината.
Од клубот посочуваат дека добрите услови за тренинг и одигрување натпревари, како и поддршката од Општина Василево и градоначалникот Славе Андонов, се значајна основа за остварување на овие планови.
„Се враќаме по седум години пауза. Амбициите ни се да ја освоиме лигата и во Василево да донесеме третолигашки фудбал. Сакаме да се врати публиката, како што беше порано, а младите да спортуваат на теренот. Општина Василево има фудбалски потенцијал. Околу 95 проценти од играчите се од нашата општина, а само четворица се од други општини. Нè радува фактот што имаме доста млади играчи“, велат од клубот.
Оттаму упатија благодарност до Општина Василево за целосната поддршка при реактивирањето на клубот. Најавуваат дека ќе го дадат максимумот на секој натпревар, како на домашен терен, така и на гостувањата, со цел да покажат дека фудбалот повторно има свое место во Василево.
Воедно, упатија повик до младите од општината кои сакаат да тренираат и да се докажуваат во фудбалот да му се приклучат на клубот. Отворени се и за поддршка од физички и правни лица кои сакаат да помогнат во развојот на ФК Василево, клуб кој во минатото беше гордост на општината. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
