На 73-годишна возраст вчера почина актерката Тинка Ристеска, која со своето повеќедецениско творештво остави силна трага во историјата на Струмичкиот театар и во македонската театарска уметност.
Тинка на 16 годишна возраст за првпат застанала на сцената на Струмичкиот театар во 1969 година, со улогата на Донка во претставата „Бегалка“. Со оваа улога започнал нејзиниот актерски пат, кој траел 55 години и во кој остварила повеќе од сто театарски улоги. Нејзиниот раскошен актерски талент бил забележан во претставите „Галеб“, „Стаклена менажерија“, „Магбет“, „Ромео и Јулија“, „Печалбари“, „Женидба“, „Крвави свадби“, „Тетовирани души“, „Бледица“, „Лет во место“, „Хамлет од Долно Гаштани…….
И по пензионирањето во 2005 година, Ристеска остана верна на сцената. Во 2019 година го одбележа својот 50-годишен актерски јубилеј, а во 2024 година прослави 55 години актерска дејност – редок јубилеј за уметник кој целиот свој живот му го посветил на театарот. Тинка Ристеска остави значаен белег и во телевизиски серии, телевизиски проекти и долгометражни филмови.
Погребот на Тинка Ристеска ќе се изврши утре, 14 јули, во 12:00 часот. Посмртните останки ќе бидат изложени од 11:00 часот во Градската капела во Струмица.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
