Шест години по убиството на Димитар од Охрид, убиецот е на слобода

179

Шест години по убиството на 26 годишниот Димитар Матилоски од Охрид, убиецот, српскиот турист Бојан Угреновиќ од Краљево е на слобода, и покрај изречената казна од 16 години затвор. Семејството обвинува за низа судски пропусти и бара правда. Судењата се одлагаа, обвинетиот излезе од притвор и си замина во својата матична држава без да сноси одговорност. Судијката која го водеше случајот во охридскиот Основен суд, Весна Кичеец беше разрешена за нестручно работење, а меѓународна потерница беше распишана дури четири години по бегството на Угреновиќ

Пишува: Соња Рилковска

Поминаа шест години од убиството на 26-годишниот Димитар Матилоски од Охрид, а убиецот, српскиот турист Бојан Угреновиќ од Краљево, сè уште е на слобода. Димитар беше претепан до смрт по банална вербална расправија на новогодишната ноќ во 2016 година, на стотина метри од неговиот дом пред кафулето „Табана“ во стариот дел на Охрид. Угреновиќ, кој го претепа момчето до смрт, не одлежа ниту еден ден од затворската казна од 16 години.

Мајката на Димитар, Драгица Матилоска обвинува за низа судски пропусти направени во Основниот суд Охрид и Апелациониот суд во Битола и бара правда за нејзиниот син.

 

Фото: Вистиномер

Јас ќе се борам до крајот на мојот живот правдата да излезе на виделина. По сè она што го гледам случајот сакаат да го заташкаат. Меѓутоа тука се виновни Апелациониот суд во Битола и Основниот суд Охрид. Сега сум останата сама да се борам со сите нив. Правдата мора да излезе, таа знае некогаш да задоцни меѓутоа ќе ги стигнe. Сметам дека судската фела ќе го слушне мојот глас, дека ќе преземат мерки и ќе преземат санкции против луѓето, кои сакаат да го заташкаат случајот. Шест години и два месеци убиецот е на слобода, а мојот син на гробишта, вели Драгица Матилоска мајка на убиениот Димитар Маилоски.

Поради повторени судења, одложувања на судската расправа, во два наврати преполовување на казната од страна на Апелациониот суд во Битола, измина законскиот рок за притвор, па така Угреновиќ во јули 2017 година беше пуштен да се брани од слобода. Оттогаш му се губи секаква трага.

Правдата мора да се задоволи. Јас ќе се борам до последниот здив да се фати виновникот. Не може неказнето да помине. Јас мислев дека за овие шест години тој ќе бида фатен и ќе биде таму каде што му е местото, дека ќе плати и оштета, не за мене – но имав желба на потегот „Месокастро“ каде што живееше и беше убиен Димитар да направам една чешма од која ќе пијат вода и охриѓани и туристи, за да ги потсетува сите на таа кобна 2016 година, за никогаш да не се повтори, вели Матилоска.

Убиецот е во бегство, но мајката не се откажува, таа бара дополнителна истрага и правда за убиството на синот. Матилоска очекува убиецот да биде пронајден и да ја одлежи заслужената казна, а бара и истрага и одговорност за сите пропусти направени во Основниот суд Охрид и во Апелациониот суд Битола.

Долгите судски процеси од три години му овозможија на убиецот да избега

Судскиот процес за убиството започна на 14 декември 2016 година. Уште на самиот почеток семејството имаше забелешки. Угреновиќ се судеше за кривично дело „убиство“, а не за „убиство на свиреп начин“, за што поседуваа докази од приватни вештачења, кои обвинителот не ги прифати. Висината на казната за овие две кривични дела е драстично различна.

Српскиот турист првично ја призна вината и изрази жалење. Семејството реагираше уште на првото рочиште.

Обвинетиот ја призна вината сега судот ќе му одреди минимална казна. Крајно сме револтирани, Очекувавме судот да ги прифати и нашите докази да влезат во постапка и да му се суди за „свирепо убиство“, а тој сега ќе се суди за „убиство“ и ќе добие минимална казна, изјави за медиумите Цветанка Матилоска Пешиќ, сестра на Димитар, на 15 декември 2016 година.

На 20 декември 2016 година судијката Весна Кичеец од Основниот суд Охрид ја донесе првата судска пресуда – 16 години затвор за Бојан Угреновиќ. На оваа одлука следуваше жалба од обвинетиот до битолска апелација. За сето ова време, Угреновиќ беше во притвор.

Второстепениот суд констатира пропусти на првостепениот суд, односно отсуство на образложени причини на околностите при одредувањето на висината на казната и закажа повторно судење за мај 2017 година.

Првата расправа од повтореното судење, беше одложена за јули 2017 година, поради отсуство на обвинетиот, кој поради презафатеност на службите со случајот „Диво Населје“, не беше донесен во охридскиот суд.

И следното рочиште беше одложено, бидејќи адвокатот на обвинетиот не се појави во судница. Оштетените обвинија дека намерно се тактизира, за да истече законскиот рок за притвор.

Целта на одбраната е да истече законскиот рок за притвор па обвинетиот Бојан Угреновиќ да биде пуштен на слобода, со што му се дава можност да ја напушти државата, изјави тогаш адвокатката Кристина Камчева Недеска.

Главната раправа од повтореното судење се одржа на 25 јули 2017 година, но тогаш обвинетиот се премисли, го смени исказот, велејќи дека не се чувствува виновен. Со тоа судскиот процес се врати на почеток, а судењето со нови сведоци беше одложенo за септември 2017 година.

Семејството и тогаш апелираше дека тој има можност за бегство.

Ние како оштетени немавме никакво законско овластување да менуваме нешто и прифативме такво признание на вина. Сега со укинувањето на пресудата опасноста е што истекува законскиот рок за максимален притвор на обвинетиот до завршување на главна расправа, по што тој може да биде пуштен на слобода, изјави Никола Мујоски адвокат на оштетените, на 25 јули 2017.

Ден потоа, навистина беше укинат притворот на Угреновиќ. Дел медимуи тоа го квалификуваа како судски скандал.

Бојан Угреновиќ (30) од Краљево, кој лани во Охрид за Нова година го уби охриѓанецот Димитар Матлиоски (27), од денеска е на слобода. Умешноста на неговата одбрана, со користење на сите можни судски „кривини“, и „наивноста“ на судиите, доведоа до тоа денеска сторител на свирепо убиство да излезе од затворот во Шутка и најверојатно да си замине во својата земја, со обврска во септември да се врати на закажано судско рочиште, пренесоа дел од медиумите на 27 јули 2017 година

Угреновиќ на својот Фејсбук профил на 7 ми септември објави своја фотографија од центарот на Скопје, означувајќи „дека се чувствува одлично“. Денес неговиот профил на Фејсбук не постои.

Иако се „чекира“ во државата, Угреновиќ не се појави на судското рочиште во Охрид закажано за 19 септември, ниту на второто закажано за 26 септември.

Тогаш судот го одложи рочиштето за 3 октомври и му изрече нова мерка притвор до 30 дена. Угреновиќ требаше да се спроведе во затворот во Охрид.

До ноември 2017 година, судењето се одлагаше седум пати, поради тоа што тој не се појавуваше пред судот и беше недостапен за органите на прогонот, но за него не беше распишана меѓународна потерница.

Ве известуваме дека барање за постапување во овој случај, како и барање за распишување на потерница од судот во Охрид до нас не доставено, информираа од МВР.

Откако Угреновиќ беше пуштен да се брани од слобода, Кривичниот совет донесе решение за изрекување мерка на претпазливост за обвинетиот, забрана за напуштање на привременото престојувалиште, хотел „Амбасадор“ во Скопје, а во отсуство му беше одреден и нов притвор, но Угреновиќ исчезна и беше недостапен за органите на прогонот.

Судењето продолжи во негово отсуство, а на 5 јуни 2018 година Судскиот совет од охридскиот Основен суд во Охрид, повторно го осуди Угреновиќ на 16 години затвор.

Но, и оваа пресуда не беше прифатена од Апелациониот суд во Битола и во март 2018 година казната беше преполовена од 16 на осум години затвор.

Во декември 2019 година, Врховниот суд, ја преиначи одлуката и наместо осум, повторно изрече 16 години затворска казна за Угреновиќ.

Разрешена судијката Весна Кичеец за несовесно постапување

Една година по одлуката на Врховниот суд, во декември 2020 година Судскиот совет ја разреши судијката од Охрид со 34 годишен стаж – Весна Кичеец, која го водеше случајот, поради нестручно и несовесно постапување во судскиот процес против српскиот турист од Краљево кој го уби младото момче.

Судијката демантираше дека нема никаква вина и најави жалба.

За ваша информација, првата моја одлука за Угреновиќ (обвинетиот за убиство) е донесена само по месец и половина од добивање во работа на предметот, по признание на вина и изречена му беше казна од 16 години. За Апелациониот суд Битола казната беше висока и ја укинаа пресудата. Висока била казната и покрај тоа што остануваа уште помалку од 4 месеци до максималниот рок за притвор. Повторно ја донесов истата одлука, Апелација ја преиначи на осум години, Врховен ја преиначи нивната и повторно изрече 16 години. Навистина не знам каде е мојата вина, ценете сами, изјави Кичеец на 25.12.2020 година.

Нејзиното разрешување ги потврди сомнежите на семејството Матилоски, но велат дека тоа не е доволно и бараат дополнителна истрага за сите инволвирани, кои нанесоа штета со одолговлекувањето на судскиот процес.

Меѓународна потерница беше распишана дури после четири години 

Семејството на убиеното момче преку социјалните мрежи, повеќе пати бараше меѓународна потерница за Угреновиќ, приложувајќи објавени фотографии на социјалните мрежи од убиецот, кој воопшто не се криеше во сопствената земја.

Меѓународна потерница не беше распишана сè до 2021 година, односно четири години по бегството на Угреновиќ.

Во врска со информација за лицето Бојан Угреновиќ кој се бара за сторено кривично дело „Убиство“ по чл.123 ст.1 од КЗ на Република Северна Македонија, Ве известуваме дека по наредба на ОС Охрид од страна на СВР Охрид распишана е централна и меѓународна потерница, одговорија од МВР на прашање на Вистиномер.

Истиот одговор го добивме и од Основниот суд Охрид, од каде потврдија дека побарале меѓународна потерница во 2021 година, но не добивме одговор зошто тоа го направиле дури четири години подоцна.

Според адвокатите кои ги консултираше Вистиномер, доколку полицијата го уапси Угреновиќ во неговата матична земја Србија, со оглед на тоа што за него е издадена меѓународна потерница, тој има право да бара повторно судење во својата земја, а казната која ќе му биде изречена да ја одлежи во Србија.

Доколку биде фатен во друга странска земја, пак, тој ќе биде екстрадиран во Северна Македонија, каде треба да одлежи 16 години затвор, по донесената правосилна пресуда на Врховниот суд.

На семејството му останува можноста да покрене судска постапка и за парична оштета.

Во 2020 година разрешени седум судии за несовесно работење

Основните вредности на ЕУ вклучуваат владеење на правото и почитување на човековите права. Од огромно значење се постоењето на ефективен (независен, квалитетен и ефикасен) правосуден систем и ефикасната борба против корупцијата, бидејќи тоа е почитувањето на фундаменталните права во закон и во практика. Земјата има одреден степен на подготвеност/е умерено подготвена да ги примени правото на ЕУ и европските стандарди во оваа област, нотира ЕК во Извештајот за напредокот на земјава.

Според истиот Извештај, Судскиот совет примил 140 барања за утврдување одговорност на судија/претседател на суд во 2020 година. Од јуни 2020 година, Судскиот совет разрешил седум судии, меѓу кои и поранешен претседател на Врховниот суд.

Причините за отказите најчесто се поврзани со непрофесионално работење. Судскиот совет формира Комисија чијашто задача е да подготви Акциски план за следење на корупцијата во правосудниот сектор преку определување конкретни целни групи, методи на следење, индикатори и временски рокови, стои во  Извештајот на ЕК за напредокот на Северна Македонија.


Овој напис е изработен во рамките на проектот Проверка на фактите за напредокот на Северна Македонија кон ЕУ, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.