Струмица до недела со Фестивал на велосипедизмот, потикнува вело култура за современ стил на живот и здрави навики

535

Со цел да се потикнат и мотивираат струмичани за користење на велосипедите како превозно средство, од денеска па се до недела со повеќе активности се одржува ,,Вело Струмица – Фестивал за лубителите на велосипедизмот”. Станува збор за активности кои се дел од проектот ,,Струмица – паметен вело град” што го финансира ЕУ а со кој  Струмица треба да добие и велосипедски патеки.

,,Препознавајќи ја уникатноста, долгата традиција, практичноста и придобивките на велосипедот како сигурен, достапен, чист и еколошки одржлив начин на транспорт и понесени од идејата за одбележување на 3.Јуни – Светскиот ден на велосипедот, од 2 до 5 јуни го организираме фестивалот „Вело Струмица“ со серија активности за различни целни групи,, објави градоначалникот на Струмица Коста Костадинов

Целиот фестивал се очекува да потикне процес на создавање на вело култура преку поттикнување современ стил на живот и здрави навики и колку што може поголема упоитреба на велосипедите низ градот.

Централниот настан на фестивалот е планиран како мулти-програмски настан, а преку создавање на „Велосипедска зона“ во рамки на најпознатата урбана локација во градот – Старата Чаршија  во Струмица ќе биде одбележан 3 Јуни – Светскиот ден на велосипедот, со почеток од 20:30 часот. На централниот настан ќе присуствуваат амбасадори, претставници на странски мисии и дипломатски кор во РСМ, градоначалници од земјата и странство и владини претставници.

Од таа причина  на ден 03.06.2022 година ќе биде воведен времен режим на сообраќајот во периодот од 12:00 часот до полноќ, односно сообраќајот ќе биде затворен за возила на улица „Маршал Тито“ (Стара Чаршија), делница од крстосница со улица „Страшо Пинџур“ до крстосница со булевар „Ленинова“. На тој дел од улицата во периодот на одржување на настанот ќе биде забрането паркирање на возила.Од крстосница со улица „Ванчо Прке“ и улица „Први Мај“ до крстосница со улица „Страшо Пинџур“ ќе биде дозволен сообраќај на возила само за станарите. На тој потег, ќе биде воспоставен двонасочен режим на сообраќај во периодот на одржување на настанот заради движење на граѓаните од улица „Страшо Пинџур“.

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.