Рената Атанасова од Струмица која по потекло е од населеното место Моноспитово, студира Општа медицина на Универзитетот „Гоце Делчев“ во Штип ја издаде втората книга. Станува збор за роман насловен како ,, Апартман 313“. Младата авторка вели дека станува збор за криминалистички роман за кој морала директно да посети и неколку психијатриски установи и директно разговарала со психијатри за да изворно се запознае за состојбата, карактерите на ликовите за да се даде одговор…. Која е цената на довербата ???????
Дрнка.МК: Што книга е „Апартман 313“ и колку време ја спремаше?
Рената Атанасова: „ Апартман 313“ е мое второ дело и станува збор за криминалистички роман, но и роман со силно изразена мистерија, а помал акцент е дадена на романсата. Апартман 313 е дело чиј процес на обработка траеше неколку години, зашто потребите на истиот ми налагаа обемни истражувања. Со оглед на тоа дека главна дестинација во самиот роман е психијатриска клиника, неопходна ми беше посета на неколку психијатриски установи ширум нашата држава и соодветни консултации, сè со цел појасно да ги визуелизирам и ликовите, но и нивните карактери и растројства.
Дрнка.МК: На ФБ напишавте после стотици непроспиени долги ноќи – Зошто ?
Рената Атанасова: Фактот дека зад романот ,,Апартман 313″ стојат стотици долги и непроспиени ноќи е апсолутна вистина, зашто јас сум човек чија имагинација особено се разгранува навечер. Процесот на пишување на еден роман е доста сложен, зашто покрај самото ,,стокмување” на мислите на авторот врз парче хартија, вклучува и многу истражување и детално оформување на ликовите, дејствата и воопшто целиот тек .
Дрнка.МК: Може ли да откриеме за суштината, дејството и пораките во „Апартман 313“?
Рената Атанасова: Како што веќе напоменав, Апартман 313 е криминалистички роман со повеќе навидум неповрзани дејства кои со текот на приказната се сплотуваат во една целина. Пораките се многубројни, но повеќето од нив се во прикриена форма и мојата цел е читателите преку редови да ја сфатат не само поентата на самиот роман, туку и секоја емоција која е вгнездена во срцето на секој лик, и на тој начин подобро да ги резимираат нивните дејства.
Дрнка.МК: Зошто да ја имам оваа книга во домашната библиотека?
Рената Атанасова: Сметам дека ,,Апартман 313″ е дело за во сечија библиотека бидејќи е извор на бројни пораки преку самите карактери на ликовите, а пораката која за мене е од особена важност е дека секој човек, на крајот го добива она кое го заслужува. ,, Апартман 313 понекогаш и не е вистински постоечка просторија. Тој, всушност е место во склоп на просториите на нашиот ум, кое доаѓа до израз секогаш кога кармата ќе дојде по своето. И затоа, одговорно Ви тврдам: Внимавајте каде водат Вашите патишта, зашто ништо не е поболно и поопасно кога на крајот од истите се наоѓа токму тој – Апартман 313.” – извадок од делото.
Дрнка.МК: Колку дела имате досега и кои се Вашите идни планови.
Рената Атанасова: Самостоен автор сум на две книги, но со свои творби заземам активно учество во повеќе дела. Мојата прва книга ,,Желбите на вистинските луѓе” е издадена во 2014 година, на мои 14 години. Изборот за збирка на есеи, наместо роман, не беше случаен, зашто мојата намера беше во моето прво дело да биде сместен мојот тогашен поглед на животот и моето размислување, за да може низ текот на целиот мој живот да се потсетувам и никогаш да не заборавам која сум. Моето второ дело е токму ,,Апартман 313″ и сметам дека е една нова, поинаква верзија од моето творештво. Во однос на мојата професија, јас сум физиотерапевтски техничар, а во моментов сум студент по општа медицина 6 година при универзитетот ,,Гоце Делчев” – Штип. Во склоп на сето тоа, плановите за иднина без сомнение ми се поврзани со медицината, но литературата и силната амбиција кон збогатување на моето творештво засекогаш ќе бидат мој најголем двигател.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
