Струмичанецот Ристо Ковачев, студент на медицинскиот факултет во Марибор во Словенија е меѓу првите македонци кој прими вакцина против вирусот ковид-19. Вакцината од производителот ,, Фајзер’’ ја примил доброволно откако не само преку учење туку и преку праксата во Универзитетскиот клинички центар во Марибор ја видел голготата на ковид пациентите. Според него единствен начин светот да се врати во нормала е токму вакцинацијата против овој опасен вирус, кој минатата година го парализираше нормалното функционирање во светот.
,, Covid-19 е моментално најактуелната болест, која има влијание на сите области од општественото живеење и единствен начин да се врати се во нормала е токму вакцинацијата. Свесен сум за сериозноста на болеста, но и кратките и трајни последици што таа може да ги остави, посебно на постарите и лицата со фактори на ризик. На 5 ти јануари ја примив првата доза од вакцината Фајзер која моментало ја има во Словенија, и се чувствувам добро. Втората доза треба да ја примам после 21 ден од првата, односно на 26 ти јануари,, ни изјави Ковачев.
23 годишниот студент од Струмица веќе три месеци работи во Ургентниот центар на УКЦ во Марибор. Се пријавил да работи откако клиниката побарала студентска помош од медицинскиот факултет. Обично работат трета смена и за време на викендите кога немаат предавања или вежби на факултетот. Вели дека добар дел од завршните студенти од факултетот се пријавиле за работа по здраствените институции во Марибор како помош на актуелниот медицински персонал кои речиси цела година се справува со последиците од вирусот.
,, Соработуваме со персоналот што работи на ургентен, правиме тријажа и земаме брисеви за брзи тестови и ПЦР. Во зависност од резултатите пациентите ги праќаме во сивиот или белиот оддел. Секојдневно сме во контакт со позитивни, но сме заштитени според здраствените прописи. Состојбата во моментов е под контрола и секој пациент го добива потребниот третман од специјалистите,, раскажува младиот студент од Струмица Ристо Ковачев.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
