Радовиш низ времето – Изложба на фотографии за развојот на градот, најстарата од пред Илинден и побуди интерес кај радовишани

586

Во рамките на манифестацијата ,,1000 години – Радовиш’’ жителите од ова општина имаат можност да го видат развојот на овој град преку фотографии што ги собирал и обработил Васе Здравков . Станува збор за дваесетина интересни стари фотографии, избрани меѓу повеќе стотици кои сведочат за животот во Радовиш од почетокот на 20. век па наваму. Тие  се поставени Центар за култура „Ацо Караманов“.

,,Овие фотографии се само мал дел од богатата ризиница на стари фотографии кои ги собирав и обработував изминатите 20 години, Радовиш има со што да се претстави како една мала урбана средина која егзистира веќе 1000 години. За жал имаме фотографии кои датираат од пред илинденскиот период и поново време, но се надевам дека ке успеам да дојдам до уште постари фотографии и во следниот период ке подготвиме уште една слична изложба која покажува еден убав времеплов на „Радовиш низ времето“,, ни изјави Здравков кој подвлече дека најстарата фотографија што досега ја има обработено е од пред Илинденскиот период

Специфичната изложба што побуди голем интерес кај граѓаните е во рамките на годинашната програма за одбележување на илјадагодишнината од првото запишано спомнување на Радовиш како средновековно гратче во грамотата на византискиот император Василиј Втори во 1019 година.

На изложбата присуствуваше и Градоначалникот на Општина Радовиш, Герасим Конзулов кој веднаш ја разгледа изложбата од изработените илустрации на плоштадот „Св.Спасо Радовишки“. Изложбата беше посетена од голем број на наши сограѓани кои ги погледнаа фотографиите од стариот Радовиш, а оние повозрасните се присетија на некои објекти, манифестации и спомнувани толкувања и историски моменти поврзани околу фотографиите и настаните кои беа претставени преку нив.

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.