Пожарникарите од Струмица, Гевгелија, Радовиш и Валандово ќе добијат опрема за справување со шумски пожари

2281

Околу 120 пожарникари од противпожарните единици од Струмица, Радовиш, Гевгелија и Валандово ќе добијат опрема за справување со шумски пожари во Југоистокот. Центарот за развој на Југоисточниот плански регион започна со имплементација на проектот „Прекугранична соработка во справување со шумски пожари” од Програмата за прекугранична соработка со соседна Бугарија во  партнерство со Асоцијацијата на Југозападни општини од Балгоевград.

Како што информираа од Центарот за развој на Југоисточниот плански регион, ќе се набави комплетна лична заштитна опрема за пожарникарите од сите ТППЕ во Југоистокот бидејки во моментов ниту една од нив нема соодветна опрема за справување со шумски пожари.

,,За пожарникарите ќе се набави професионална опрема за шумски пожари која вклучува комбинезони, ќебиња, чизми, ракавици, шлемови направени специјално за шумски пожари, заштитни маски против чад и балаклави огноотпорни маски. За секоја од противпожарните единици во регионот ќе се набават пумпи, противпожарни црева и моторни пили. Со оваа опрема значајно ќе се унапреди безбедноста и функционалноста на пожарникарите од регионот и нивен навремен и соодветен одговор против шумските пожари кои предизвикуваат огромни штети, ја уништуваат нашата шума, природата, а не ретко како што е познато од минатото има и човечки жртви,, сооопштија од Центарот за развој на Југоисточниот плански регион

Проектот предвидува и креирање на прекугранична мрежа за спречување и одговор на опасности од природата и животната средина во која ќе учествуваат претставници на општинските територијални противпожарни единици и волонтерските заедници од двете земји чија цел е да се создаде добра координација и структура за превенција и соодветен одговор на катастрофите со посебен акцент на шумските пожари. За таа цел за членовите од мрежата предвидено е спроведување на шест обуки од страна на меѓународни сертифицирани обучувачи. Ќе се спроведе и информативна и медиумска кампања за промовирање на волонтерство и спречување на шумските пожари.

Проектот е со вкупна вредност од 395.361 евра, од кои буџетот за Центарот за развој на Југоисточниот плански регион е 197.602 евра, а истиот ќе се имплементира 24 месеци.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.