Дел од песните од стихозбирката ,,Молитвеник од претходниот живот’’ на струмичката поетеса Сузана Мицева излегоа во реномираното списание за литература ,,Хелис’’ кој на романскиот пазар излегува цели 16 години. Авторката тврди дека песните сами стасале до Романија бидејки лани ова збирка ја понесе втората награда во Вевчани струшко на конкурсот за необјавена поетска збирка ,,Јован Котески,, . Како што кажа таа главни виновници за пробивот во печатеното и онлајн издание на списанието ,,Хелис’’ се Сашо Бетоски и Татјана Бетоска која ги превела песните на романски јазик
,,Секој што пишува не мисли каде ќе стаса неговиот збор. Не сум поет со предумисла. Ниту пак тоа ме вознемирува. Единствено за што се грижам, е секогаш да имам со мене телефон или пенкало, нешто со што ќе можам да го запишам тоа што во моментот ќе ми надојде. А надоаѓа како река. Оттука, моите песни сами стасаа до Романија. Песните се Молитва, Непростување, Терапија, Молидбена и Раздолжување сместени во збирката која е поделена во три циклуси : Збор, Молитва и Дом. Тоа е интимна поезија , се чита тивко или во себе’’, вели поетесата Мицева
Нејзини песни досега се објавени на бугарски и хрватски и вели дека поезијата за себе не познава граници за да ги признае, туку таа е подложна единствено на природната волја и слободна како ветар.
,, Имам три објавени стихозбирки и материјал за двојно повеќе. Ова го кажувам бидејќи за мене целта не е објавувањето, туку пишувањето е едноставно начин на живот. Тоа е потреба, да се каже, да се излее тоа што се таложи, врие и треба да се излее. За мене пишувањето е како прочистување, самоисцелување. Или поедноставно – раѓање и ослободување’’, вели Мицева која паралелно е и новинар
Сузана Мицева во ноември минатата година, ја доби и на наградата „Горан Бујиќ“ во категоријата млади книжевници – новинари што ја доделува Друштвото на писатели на Хрватска а ја понесе и годишната општинска награда на Струмица
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
