Пет најбизарни дезинформации за вакцините во 2021 година

383

Здравствените власти нарачаа големи количини вакцини против ковид-19, без притоа да знаат колку од граѓаните во земјава се заинтересирани да ги примат. На почетокот од вакциналната кампања се вакцинираа оние граѓани кои сакаа да го сторат тоа, а потоа почна трката меѓу антивакциналните дезинформации од една страна и обидите тие да се сузбијат со официјални и точни информации од друга страна. Во текот на сите месеци додека трае имунизацијата против ковид-19, не престануваат и лажните наративи околу нејзината безбедност, ефикасност, состав, компликации кои наводно ги предизвикува. На крајот од годината ги издвојуваме најбизарните пет антивакцинални наративи споделувани на социјалните мрежи

Пишува: Мирослава Бурнс

1. ПОЛИТИЧАРИТЕ И БОГАТИТЕ СЕ ПРИВИЛЕГИРАНИ, ПА ЗАТОА ПРИМААТ ПЛАЦЕБО ИЛИ ВООПШТО НЕ СЕ ВАКЦИНИРААТ

Во текот на годината, на Фејсбук вриеше од лажни постови, на кои беа прикажувани политичари, пејачи од цел свет на видеоматеријали како ја примаат вакцината, меѓутоа иглата од шприцот е безбедносна и се повлекува, па затоа кога ќе се отстрани од рамото, не се гледа. Ова беше доволно за заговорниците на антивакцинални наративи да заклучат дека вакцините се вистински за сиромашните и обичните граѓани, а богатите, славните и влијателните моќници не ги примаат.

Но, дополнителното истражување на овие видеоматеријали кои беа споделувани во лажен и погрешен контекст, речиси секогаш покажа дека вакцинацијата е вистинска. Политичарите и јавните личности се вакцинираа пред камерите затоа што на таков начин сакаат да дадат пример за останатите луѓе во своите држави, односно да ги охрабрат да се имунизираат. Примери каде политичари беа злоупотребувани односно клеветени дека не се вакцинирани, веќе рецензиравме за белгискиот политичар Барт Сомерс, австриската пратеничка Ева Марија Химелбауер која што иако се вакцинираше и против грип и против ковид-19, како бремена жена во поголем ризик од ковид, сепак заврши во дезинформациски контексти.

За директорот на „Фајзер“, Алберт Бурла, исто така, лажно се тврдеше дека не се вакцинирал со вакцината на компанијата што ја води, само за да се создаде сомнеж во безбедноста на вакцините. Но, директорот  Бурла е вакциниран уште во март месец.

Дури и психијатарот Александро Мелуци тврдеше дека му понудиле лажно да се вакцинира, ама ги одбил зашто не сакал да си ја извалка кармата. Меѓутоа, неговата лажна изјава ги вознемири политичарите кои му реплицираа дека дури до Дубаи биле да се вакцинираат кога немало вакцини во нивната земја и дека тој не ја говори вистината.

Имаше и случај кога аргентински лекар кој најрегуларно се вакцинирал, беше обвинет дека манипулирал со вакцината, односно дека примил две дози во ист ден (само за пред камери), иако тоа не беше точно.

И пејачката Мараја Кери не ги избегна нелогичните обвинувања дека лажно се вакцинирала и тоа пред камерите, иако сите вакцини кои се администрираат имаат свој сериски број и код кој влегува во вакциналниот сертификат.

2. ВАКЦИНИТЕ ВЕ ПРАВАТ МАГНЕТ

Метални лажици, монети и други најразлични предмети, почнаа да се појавуваат залепени на рамото на лица кои се снимаа на социјалните мрежи после наводна вакцинација. Нивното униформно тврдење беше дека од вакцините станале магнетни, па затоа на рамото сега може да лепат метални предмети.

Оваа бизарност дополнета со лагата дека во вакцините има магнетни микрочипови, предизвика и сатирични реакции но имаше и граѓани кои поверуваа. Вакцините на ниту еден производител не содржат метали. Дозата на вакцината е помала од еден милилитар. Стандардната доза на „Фајзер“ содржи 0.3 милилитри. Тоа не е доволен волумен за да се вметне микрочип, дури и кога некој би посакал да направи такво нешто.

Дури и девојката која го почна предизвикот на Тик Ток за лепење на вакви предмети на рамото, за Би-Би-Си изјави дека ,,луѓето треба да престанат да веруваат во се што ќе видат на Фејсбук, Јутјуб или на Тик Ток”, додавајќи дека сето тоа било шега и го повлече видеото. Нејзиното извинување може да го погледнете со почеток на 2 минута на ова видео. Но, беше предоцна, бидејќи предизвикот на лепење метални предмети и дезинформациите дека тие се лепат на рамото поради вакцината против ковид, веќе зеде залет и покрај исклучителната невистинитост која ја промовираше овој тренд.

3. ВАКЦИНИТЕ СЕ ОПАСНИ, ПА ТРЕБА ДА СЕ ЧИСТАТ ОД ТЕЛОТО СО ПОСТ НА ВОДА И СУРАМИН

Имаше и тврдења дека откако ќе ја примите вакцината против ковид-19, уште ,,имате време да се спасите од нејзините штетни ефекти” на начин што ќе практикувате немедицински, опасни и небазирани на докази практики, како постење на вода во времетраење од 40 дена, или земање лекарства на своја рака.

Ваквата немедицинска препорака беше дадена за лекот „Сурамин“, којашто беше брзо демантирана од страна на медицински експерти и граѓаните беа предупредени на своја рака да не земаат никакви лекарства за наводни несакани ефекти после вакцинација. Најчестите несакани ефекти вклучуваат болка во рамото, главоболка, болка во телото, температура кои траат еден до два дена по што се повлекуваат и се знак дека телото создава имунолошки одговор на вакцината.

Под премисата дека во вакцините има некакви ,,токсини”, се препорачуваше и наводна детоксификација со 40 дневен пост на вода, кој не е медицински оправдан. Пролонгиран пост на вода во времетраење од 40 дена не би требало да се спроведува без медицински надзор. Во 2011 година, пациентот Џонатан Кам почина после 32 дневен пост на вода. Студија на овој линк, покажува дека негативните ефекти на постот на вода се замор, проблеми со срцето и нерегуларно срцебиење, висок или низок крвен притисок, болки во стомакот и вртоглавици. Долгорочните пости на вода се поврзани со нездраво слабеење, губење мускулна маса, постојан замор и чувство дека ви е ладно, промени во расположението. Во светот не постои ниту едно истражување, ниту една препорака од официјално медицинско тело, вклучително и СЗО, Американската агенција за храна и лекови, Европската агенција за лекови, ниту пак, каков било научен став, дека после вакцина е потребна каква било детоксификација, а уште помалку со 40 дена пост на вода. Овој „изум“ – 40 дневно постење на вода, претставува опасен метод, којшто не треба да се спроведува од кого било без медицински надзор и без консултација со лекар.

4. ВЕРНИЦИТЕ СЕ „ЗА“, А НЕВЕРНИЦИТЕ „ПРОТИВ“ ВАКЦИНАЦИЈА

Религиските чувства и верските определби на граѓаните, честопати беа доведувани во корелација со вакцинацијата во еден лажен наратив, дека верниците се против, а неверниците за вакцинација. Ова се разбира не е точно, а го потврдува и фактот што бројни религиски организации и нивните челници препорачаа вакцинација за своите верници по сопствена желба и лично убедување. Верските чувства на граѓаните беа користени и како оружје да се напаѓаат оние кои решаваа да се вакцинираат со тезите дека го примиле жигот на ѓаволот и дека му се потчиниле. Имаше постови на Фејсбук во кои се тврди дека ,,Исус е против вакцинацијата” и покрај тоа што  овој јавен повик од страна на МПЦ, ИВЗ и Католичката црква покажува дека ниедна верска заедница од овие три не е против вакцинацијата.

По средбата на премиерот Зоран Заев со лидерите на Македонската Православна Црква – Охридска Архиепископијa aрхиепископот Охридски и Македонски г. г. Стефан, на Исламската верска заедница Реис ул Улема Хаџи Шаќир ефенди Фетаи и на Католичката црква монсињор Киро Стојанов, бискуп скопски и струмичко-скопски епарх, Владата соопшти дека сите поглавари ја поддржуваат вакцинацијата против ковид-19. Од страна на верските лидери присутни на состанокот е укажано дека заштитата на здравјето не е само обврска на државата, туку е и верска обврска бидејќи секој човек е должен, како општествено, така и според верата, да биде во служба на здравјето. Заеднички е констатирано дека во овие моменти кога човештвото се соочува со непредвидлив вирус, потребна е разумност од страна на сите верници, бидејќи болеста не избира религии и нации.

5. ОД АВИОНИ НÈ ПРСКААТ СО КОРОНАВИРУСОТ

Во 2021 година провејуваше и дезинформацијата дека коронавирусот се прска од авиони и како „доказ“ за тоа се прикажуваа вообичаени видеа од патнички авиони во лет, кои зад себе оставаат траги на кондензација, односно контрејлс. Пилотот Дејан Саздовски за телевизијата „Канал 5“ објасни дека не е можно состојка да се аплицира од лет во авион на минус 54 степени од 10 километри висина (4 минута 50 секунда од видеото). Тој рече дека не е можно физички тоа да се случи, а белите линии на авионите се најнормална појава на термодинамика, поради тоа што има разлика меѓу температурата на авионот и надворешната температура. Авионите летаат на минус 54 степени а температурата на издувните гасови е 800 степени, поради таа температурна разлика се создаваат белите линии позади авионите. Пилотот Саздовски рече дека кога некој би правел прскање, на толку голема територија би му требале илјадници авиони.

Коронавирусот, пак, како што е познато, се пренесува на растојание помало од два метри преку капките од носот и устата, преку зборување, кашлање, пеење. Не се прска ковид од авиони.

Што се однесува до „кемтрејлс“ конспиративните теории, истите досега се повеќепати разоткриени од проверувачите на факти, меѓу кои, чешкиот сервис за проверка на факти, Manipulatori.cz., српскиот сервис Istinomer.rs , како и во повеќе рецензии на „Вистиномер“.

Ваквата теорија на заговор е категорично отфрлена од научната заедница. Уште пред пет години (ноември 2016) група од 77 научници објави извештај откако ги прегледа наводните докази дека некои авиони нè прскаат со хемиски супстанци. Од тие 77 научници, 76 изјавија дека не нашле докази за „тајна атмосферска програма од големи размери“. Со други зборови, доказите укажуваат на тоа дека патеките се очекуваниот резултат на авионите што летаат во воздухот.

Овој напис е изработен во рамките на Проектот за брзо справување со вакциналните дезинформации, имплементиран од Фондацијата МетаморфозисТој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.