„Како дете растев слушајќи приказни за Огражден, за натпреварите, за полните трибини и за гордоста што клубот им ја носел на луѓето во Ново Село. По повеќе од половина век историја, чувствував дека имаме обврска повторно да го вратиме клубот таму каде што му е местото.“ Вака раскажува Бојан Боев кој специјално за денешниот меч меѓу Огражден и Интер Кукла дојде од Швајцарија во Ново Село за да ги бодри своите.
„ Најголемата победа за мене не е првото место на табелата. Најголемата победа е тоа што фудбалот повторно се врати во Ново Село и во останатите села од регионот. Кога одам низ регионот, ја гледам страста кај луѓето. Ги гледам децата како доаѓаат на тренинг. Ги гледам родителите, навивачите и волонтерите. Повторно се зборува за фудбал. Повторно има натпревари што значат нешто. Повторно има чувство на припадност и заедништво. Искрено верувам дека токму тука лежи иднината на македонскиот фудбал.“ смета Боев
Тој е страствен љубител на спортот во родното Ново Село. Не сакал да биде само нем гледач на состојбите во родното место од Швајцарија. Со неколку пријатели ја основаа Sport4Kids.ch која прерасна во меѓународна невладина организација преку која на многу попрофесионален и организиран начин го поддржуваат развојот на спортот во Ново Село и регионот.
„Нашата мисија остана иста како на почетокот – да им создадеме подобри услови и повеќе можности на децата преку спортот. Она на што сум особено горд е што сето ова никогаш не беше проект за резултати. Од првиот ден беше проект за децата. Денес имаме околу 150 деца во нашите програми. Речиси половина се девојчиња кои играат одбојка, а другата половина се деца кои тренираат фудбал. Гледаме насмевки, гледаме дисциплина, гледаме самодоверба и гледаме деца кои учат што значи тимска работа. За мене тоа е најголемата победа. Секако, спортските резултати се прекрасни. Во одбојката по само една сезона веќе сме меѓу четирите најдобри екипи, а во фудбалот, кој би поверувал дека по само една година работа ќе дојдеме во ситуација да се бориме за првото место?“, вели Боев за Дрнка МК
Денеска во 17 часот ФК Огражден и ФК Интер Кукла одлучуваат кој ќе биде ШАМПИОН . За Боев ова е само сатисфакција за тригодишната работа од Швајцарија.
„Се надевам да го видам резултатот од три години работа, од стотици луѓе кои веруваа во истата идеја, од сите волонтери, тренери, родители, деца, донатори и поддржувачи кои помогнаа оваа приказна да стане реалност. Затоа сум горд што сум претседател на Sport4Kids. Не поради функцијата, туку поради луѓето кои покажаа дека со доволно волја може да се постигне нешто што на почетокот изгледало невозможно. Ако оваа приказна послужи како пример дека и во Струмичко, и во Ново Село, и во цела Македонија можат да се случуваат убави работи кога луѓето работат заедно, тогаш ќе знам дека вредеше. Спортот обединува. Политиката разделува.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
