Во присуство на државниот врв, претставници на локалната самоуправа, бизнис заедницата и бројни гости, денес официјално беше отворен МЕГА Шопинг Парк во Гевгелија. Со површина од над 20.000 квадратни метри и повеќе од 50 светски и домашни брендови, овој комплекс претставува најголемиот ритејл парк на Балканот од овој тип.
Генералниот директор на МЕГА Шопинг Парк, господин Сотирис Јанакудакис, со свечено обраќање пред присутните го прогласи комплексот за отворен.
„Денес славиме реализација на една голема визија и проект што го рефлектира силниот економски потенцијал на земјата и нашиот регион. МЕГА Шопинг Парк е создаден да постави нови стандарди, а со внимателното интегрирање на сите содржини на едно место, создадовме уникатен простор кој го нуди концептот ‘Total Experience’ и во целост ги задоволува сите потреби на посетителите. Нашата амбиција е јасна, а тоа е да ја трансформираме Гевгелија од транзитна точка во вистинска регионална и европска дестинација и да создадеме модерно обележје на кое целата заедница ќе биде горда“, изјави Јанакудакис.
Присутните ги поздрави и градоначалникот на Општина Гевгелија, господин Андон Сарамандов, кој истакна дека ова е најголемата инвестиција во општината изминатите години, во вредност од над 30 милиони евра.
„Отворањето на МЕГА Шопинг Парк значи нова економска енергија за локалната заедница. Овој проект ќе овозможи над 400 нови вработувања и ќе придонесе за поголем број ноќевања од транзитните туристи. Гевгелија денес е ставена на мапата на сериозни инвестиции и прераснува во регионален центар на шопинг туризам, дестинација со врвни трговски, угостителски и забавни услуги“, истакна градоначалникот Сарамандов.
По свеченото пресекување на лентата и официјалната протоколарна тура низ комплексот, своја изјава за медиумите даде претседателот на Владата на Република Северна Македонија, господин Христијан Мицкоски.
„Овој шопинг-центар е огромна додадена вредност за економијата, не само во Гевгелија, туку и за целата држава. Очекувам да прерасне во место кое ќе го посетуваат сите кои транзитираат низ Македонија по Коридорот 10, бидејќи содржините што ги нуди се навистина импресивни. Колку повеќе вреди вашиот бизнис и колку е тој поголем, толку државата станува посилна. Ова е прекрасен објект кој на економијата во Гевгелија и дава нова димензија“, изјави премиерот Мицкоски.
За време на официјалната обиколка, присутните имаа можност детално да се запознаат со сите сегменти на комплексот кој е внимателно поделен на неколку клучни зони. Посетителите имаат на располагање импресивна Fashion зона на површина од 12.000 квадратни метри, специјализирана Home Decor и DIY зона која зафаќа 5.000 квадратни метри, најголемата боулинг зона во регионот Bo Bowling & Gaming Arcade на импресивна површина од 2.500 квадратни метри, како и делот за храна Gourmet Avenue. Како предводник на модерните трендови и одржливоста, паркот располага и со Smart & Eco сегмент кој вклучува 12 брзи полначи за електрични возила.
Отворањето на комплексот предизвика огромен интерес кај јавноста, па така во изминатите 24 часа МЕГА Шопинг Парк го посетија над 10.000 посетители од земјава и целиот регион. Празничната атмосфера започна уште во четвртокот со спектакуларните настапи на македонската поп-ѕвезда Тамара Тодевска и популарната грчка пејачка Иви Адаму, кои со своите концерти ги наполнија капацитетите на паркот и приредија незаборавно шоу за сите присутни.
Прославата по повод отворањето продолжува во текот на целиот викенд со богата програма, големи попусти во сите продажни салони и многу забава за најмладите со голем број аниматори. Музичката програма за преостанатите три дена носи концерти на големи мега ѕвезди, па така во петок попладне на сцената излегуваат Кирил Џајковски и Никифор, сабота е резервирана за настапите на Северина и Жаре Бербер, додека во недела големото отворање се заокружува со концертите на Пајак, Зијан и Слаткаристика.
Целиот овој концепт на модерно пазарување и масовни настани го потврдува новиот идентитет на МЕГА Шопинг Парк како дестинација од регионален формат. Ваквиот грандиозен старт е само вовед во богатата агенда на настани и активности кои во иднина ќе го направат овој комплекс централно место за посетителите од целиот регион.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
