Државниот завод за статистика објави Дополнителен јавен конкурс за ангажирање на реонски попишувачи и инструктори, кој ќе трае до 7 март а ќе бидат ангажирани за пописот од 1 до 21 април. Според информациите, на првиот конкурс што беше објавен последните денови во февруари за дел од реоните за попис во земјава не се јавиле доволен број кандидати или пак поднеле несоодветна документација. Од таа причина од вчера 3 март тече Дополнителниот јавен конкурс за ангажирање на попишувачи и инструктори за 28 пописни реони меѓу кои и за реони во Југоистокот со исклучок на Богданци и реонот на Радовиш и Конче за кои веќе се пополнети местата.
Во Дополнителниот јавен конкурс се бараат попишувачи и инструктори за реонот Струмица и Василево, за реонот Ново Село и Босилово, за Валандово и за реонот Гевгелија и Дојран. Условите за пријавување се идентични како и на првиот јавен конкурс. Кандидатите да се државјани на Македонија, да се полнолетни, да имат завршено најмалко средно образование и да немаат засновано работен однос.
Во објавениот конкурс стои дека кандидатите, кои својата намера да учествуваат во Пописот 2021 година ја изразиле на Јавниот конкурс кој беше објавен на 23.02.2021 година за пријавување во период од 23.02- 28.02.2021 година, не треба повторно да се пријавуват.
Државниот завод за статистика го објави и Правилникот за утврдување на начинот и поблиските услови за утврдување на надоместокот за извршените работи на учесниците во Пописот, 2021 година ги утврдува и надоместоците за реонските попишувачи и реонските инструктори. Надоместокот за попишувачите и инструкторите за правилно внесени податоци во електронскиот прашалник можете да го видите ТУКА
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
