Да се одложат сите екскурзии во Италија и да не се патува во земји со повеќе случаи на коронавирус, одлучи Владата

1407

Владата на денешната седница донесе одлука и ги задолжи сите основни и средни училишта, како и сите универзитети од земјава да ги одложат сите предвидени патувања и екскурзии во Италија. Паралелно им препорачува на граѓаните да не патуваат во Италија и во други земји каде што е регистрирано поголемо присуство на корона вирусот. Ова се дел од одлуките и заклучоците на Владата врз основа на препораките на Кризниот штаб за справување со „корона“ вирусот на Министерството за здравство, и на Управувачкиот комитет за координација и управување во системот за управување со кризи.

Владата донесе заклучок да го ограничи влегувањето во земјата од кризните подрачја од Северна Италија само  преку аеродромите во Скопје и Охрид и граничните премини Ќафасан, Табановце, Блаце, Богородица и Деве Баир. Паралелно му наложи на Министерството за здравство итно да набави соодветна количина на заштитни средства (маски, ракавици, дезинфекциски средства и заштитна облека) за институциите од системот но и итно да набави соодветна количина сапун и дезинфекциски средства за училиштата, детските  градинки и јавните тоалети.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.