Десетина домакинки од Општина Босилово во недела на училишното спортско игралиште во Босилово ќе приготвуваат домашен ајвар а голем дел ќе донесат разновидни специјалитети од црвени пиперки. Паралелно ќе има и богато културно уметничка програма каде ќе учествуваат Ленче Кукиќ, Благица Калева, Живко Динев, Бисера Гавровска, КУД „Гоце Делчев“ – Босилово, КУД “Кирил и Методиј“ – Иловица.
Вака е замислена Ајверијадата во Општина Босилово која за првпат се организира а ќе има за цел да го промовира производството на пиперките од сортата куртовска капија но и да се презентираат разновидни специјалитети приготвени од вредните домакинки од ова општина.
Ајварот што ќе се приготви ќе се дегустира на лице место со домашно сирење а паралелно по штандовите може да се вкуси и лутеница, малиџано како и други традиционални рецепти од црвени пиперки.
Манифестацијата е под покровителство на Општина Босилово и Министерството за земјодество шумарство и водостопанство.
Сите заинтересирани лица кои сакаат да се вклучат во активностите поврзани со „АЈВАРИЈАДАТА“ може да се пријават во Општина Босилово или на телефонскиот број 070-303-795.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
