Во Гевгелија секој трет на велосипед за било каде, во Струмица на кафе се оди со моторно возило

4971

Се претпоставува дека повеќе од 3.000 гевгеличани секојдневно возат велосипед за каква било намена како превозно средсство. Се сметаат за лидери во користење на велосипеди во земјава. Сликата е впечатлива во раните утрински часови или пак попладне кога работниците одат и се враќат од работа, што од текстилните фабрики, што од казината. Се шегуваат дека не си гевгеличанец ако немиш точак за на работа, пазар или школо

„ Тоа е традиција кај нас. Нема семејство, а да нема минимум два до три велосипеди, и за децата и за возрасните. Овде и стари и млади возат велосипед најверојатно што Гевгелија е рамна како тепсија. Едни го користат за да одат на школо, факултети, други за на работа, трети за извршување на секојдневни обврски, да пазарува, да плати сметки. Сите возат велосипед оти Гевгелија е рамна како тепсија“, велат гевгеличани кои официјално немаат велосипедски клуб

За жителите на Гевгелија не е важно што модел на велосипед имаш, туку тој да е функционален. Тошко Дудев, сервисер и продавач на велосипеди вели дека кај него се носат сите модели на велосипеди на сервис, иако во последно време младите повеќе користат спортски модели за планински велосипедизам.

За разлика од Гевгелија, Струмица има и велосипедски клуб и обележани патеки па дури и локации за паркинзи, но ретко кој вози велосипед до работа или до пазар, иако добар дел е рамничарски. Струмичани се шегуваат дека дури и на кафе се оди со автомобил а не со велосипеди, кои претежно во Струмица се користат за рекреација или пак за велосипедски тури по планините во струмичкиот регион.

„Последниве години значително е зголемен бројот на велосипедисти во Струмица, претежно од младата популација. Ги користиме рекреативно за посети на излетничко-рекреативните места како што е Св. Илија, манастирите во Водоча и Вељуса, но и до природните убавини на Беласица и Огражден. Многу малку може да се видат граѓани кои со велосипеди одат на работа. Верувам дека полека се менуваат навиките и во Струмица и струмичани ќе го заменат автомобилот со велосипед, оти на тој начин се грижиме од една страна за нашето здравје, не ја загадуваме животната средина и ги избегнуваме сообраќајните метежи“ , кажа Кире Тасев од ВК ,,Актив’’ од Струмица.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.