Автомобилистите од Стојаково со легендарното ,,Рено 4’’планираат да патуваат за Индија по патот на Мајка Тереза

137

Возачкиот тандем Џоко Шуклев и Ѓорѓи Николов од Стојаково, кои летово реставрираа возило „рено 4“ старо 40 години и со него патуваа до Франција и назад, се подготвуваат за нова патна авантура. Планираат со „реното“ да патуваат до Мумбај, Индија по стапките на хуманистката и мисионерка Мајка Тереза, но и низ државите низ кои минувал Александар Македонски. На тој начин сакаат да ги поврзат родното село Стојаково со овој милионски град.

Целата маршрута до Индија и назад е долга 19 илјади километри и според плановите на Шуклев и Николов, би се тргнало на 23 март идната година за да се вратат на 1 мај во Стојаково. За Индија ќе патуваат преку Грција, Турција, Грузија, Азербејџан, Иран, Пакистан.

„Ова ќе биде нашиот нов потфат кој пред сѐ, ќе зависи од средствата. Според нашите проекции, ќе ни бидат потребни околу 15 илјади евра бидејки планираме уште едно возило со логистичка подршка со механичар, медицинско лице и шофер, зашто ќе се патува огромна делница по пустини и непознати предели. Во фокусот ќе ни биде да ги обезбедиме потребните средства, кои секако деќа ќе бидат и од наши спонзори“, вели Џоко Шуклев, правник и страсен влубеник во возењето со стари возила.

„Нема да оставиме ништо на случајност. Мислам дека со Џоко сме подготвени да ја реализираме ова мисија. Веќе имаме искуство. Треба да се има само желба и цел. Нашата цел е да ги промовираме Стојаково и Македонија во Мумбај и да ги пренесуваме пораките на Мајка Тереза. Нема да биде лесно, но мислам дека ќе успееме во овој потфат“, ни рече Николов, кој е професионален возач.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.