Струмица го доби мултифункционално спортско игралиште со комплетно партерно уредување. Се наоѓа во Втората урбана заедница, кај ООУ „Никола Вапцаров“ и од денеска е пуштено во употреба, а најмногу му се израдуваа најмладите жители од овој дел на градот. Радоста со нив ја споделија и градоначалникот Костадин Костадинов, директорот на ЈПКД „Комуналец“ Зоран Горгиев, членови на Советот на општина Струмица и претставници на општинската администрација.
Игралиштето е општинска инвестиција од близу 12 милиони денари и е четврто такво досега направено во градот.
-Станува збор за проект којшто е производ на добрата соработка со ЈПКД „Комуналец“ и им благодарам на менаџментот и на сите вработени во претпријатието. Продолжуваме со таков тип на игралиште и во Турското маало за кое веќе имаме избрано изведувач и очекуваме деновиве да започнат со работа и секако и во населените места, а за наредната година такво игралиште најавуваме за населеното место Банско. Конкретно, за овој проект станува збор за општинска инвестиција во вредност од близу 12 милиони денари со што ги потврдуваме заложбите на Општината преку добрите и мудри одлуки од страна на мнозинството советници во Советот на општина Струмица, како навистина се грижиме за она што значи потреба на граѓаните, секако дека го промовираме здравиот начин на живот, можноста за рекреација на струмичани, на учениците од ООУ „Никола Вапцаров“, но и на граѓаните коишто живеат во Втората урбана заедница. Нека ни е со среќа и нека ни се множат такви убави проекти во интерес на граѓаните, рече Костадинов.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
