Граѓаните од Југоистокот може да добијат ваучери за инвертер клими од 23 до 30 илјади денари – еве како да се аплицира

5350

Министерството за економија ќе доделува потврда – ваучер за купување и вградување високоефикасни инвертер клима уреди, со цел да се зголеми енергетската ефикасност во домовите и да се заштеди електрична енергија. За ова мерка оваа година се предивдени да бидат доделени 7000 ваучери во висина од 4.1 милион евра по принципот прв дојден – прв усужен. За граѓаните од Пелагонискиот и Југозападниот регион ваучерите ќе бидат со износ од 25 илјади денари додека за граѓаните од остантите региони меѓу кои и Југоистокот односно за граѓаните од 10 те општини од овој дел на државата ваучерите ќе бидат до 23 илјади. Огласот  и кои се потребни  документи да се аплицира може да се виде ТУКА . На линкот е огласот кој важи за граѓаните од општините Струмица, Василево, Босилово, Ново Село, Валандово, Богданци, Дојран, Гевгелија, Радовиш и Конче.

Нешто повисоки се ваучерите за граѓани од ранливите категории за кој огласот може да се види ТУКА . Лице со со ниски примања за самец (вкупни приходи до 21.000 денари), домаќинство со два члена (вкупни приходи од 30.000) и домаќинство со три члена (вкупни приходи од 35.000 денари), ќе може да добијат ваучер во вредност од 27.000 денари во бруто износ по домаќинство, со вклучен ДДВ за купување и вградување високоефикасни инвертер клима уреди, а лицата со ниски примања за домаќинство со четири члена (вкупен приход од 40.000 денари) и домаќинство со пет члена и повеќе (вкупен приход од 45.000 денари) ќе може да добијат ваучер за инвертер клима во вредност од 30.000 денари во бруто износ по домаќинство, со вклучен ДДВ.
Ова се условите кои треба да ги исполнуваат сите домаќинства за да го остварат правото на учество по овие јавни огласи:
  • во изминатите три календарски години не користеле средства од било кој извор за надомест на трошоци за грејни уреди – печки на пелети или високоефикасни инвертер клима уреди;
  • да нема приклучок на градско централно греење во станбениот објект каде што ќе биде инсталиран уредот – уредот да биде купен и вграден во текот на 2024 година, а најдоцна до 30.11.2024 година на адресата која е наведена во барањето;
  • набавениот уред задолжително да ги има следните карактеристики: да има минимум COP 3.0, да грее на надворешна температура од -15°C  и биде најмалку А+ енергетска класа за потрошувачка на електрична енергија за греење;
  • нема да поднесе барање за искористување на финансиска поддршка преку доделување на потврда – ваучер за купување и вградување високоефикасни инвертер клима уреди по јавниот оглас од Програмата за заштита на ранливи потрошувачи на енергија за 2024 година (за оние кои ќе аплицираат за Програмата за поттикнување за енергетска ефикасност).
Огласите ќе траат 20 дена од денот на објавувањето, со можност за продолжување од 15 дена, во случај на недоволен број пристигнати барања.
Едно лице од едно домаќинство може да поднесе само едно барање за доделување на потврда – ваучер за купување и вградување високоефикасни инвертер клима уреди.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.