Вклучување и на општините Василево, Босилово и Ново Село во јавниот градски превоз на Струмица, односно воведување линии и кон овие општини. Ова е една од темите на кои разговарале градоначалниците на четирите општини од Струмичкиот регион на средбата во кабинетот на првиот човек на Струмица Петар Јанков.
Конкретен заклучок не е донесен, но градоначалниците Петар Јанков, Славе Андонов, Ристо Манчев и Ѓорѓе Божинов изразиле подготвеност да се разгледат сите можни опции и решенија за воведување меѓуопштински јавен превоз со автобусите на ЈП Струмица Транспорт. Целта како што дознаваме е да се понуди поголем пазар на оперирање на ова јавно претпријатие но и можноста граѓаните од трите рурални општини да добијат организиран превоз од населените места до градот Струмица.
Градоначалникот на Струмица Петар Јанков по средбата со своите колеги напиша дека разговарале за заедничка визија за развој, работа и просперитет на Струмичка котлина. Во неговата изборна програма стои дека ќе работи на зголемување на капацитетите на ЈП ,,Струмица Транспорт“ со нови линии и кооперанти.
,,Унапредување на работата на јавното претпријатие преку зголемување на капацитетите на истото со нови линии и кооперанти од приватниот сектор. Договори за соработка со соседните општини со цел да ја развиваме меѓуопштинската соработка преку подобрена мобилност на граѓаните и подобро поврзување со градот,, стои во изборната програма на Петар Јанков
По средбата, дел од градоначалниците на ФБ објавија дека разговарале за воведување јавен превоз на ниво на целиот струмички регион. Освен за оваа акцент дале и на дивите депонии, регионална туристичка понуда, меѓуопштинската соработка и други прашања.
Јавниот градски превоз во Струмица почна да функционира минатата година откако Општина Струмица набави десетина електрични автобуси на лизинг. Тогашната опозиција постојано реагираше на цената тврдејки дека истата е висока.
Во моментов автобусите на Струмица Транспорт оперираат на територијата на општина Струмица одржувајки вкупно 10 линии . Цената на едно возење во градот изнесува 30 денари, месечен билет за сите изнесува 1400 денари додека за учениците и студентите 500 денари, пензионерите пак месечен билет ќе ги чини 700 денари. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
