Општина Струмица до крајот на јануари идната година ќе набави повеќенаменско возило со голема проодност за реакција при пожари и поплави со цел да се заштити населението во општина Струмица и да се спречат ризиците и ублажат последиците од природни катастрофи и непогоди. Вака најави градоначалникот на Струмица Коста Јаневски кој го презентираше активностите и целите на проектот од Програмата за прекугранична соработка со соседна Бугарија насловен како ,,Заштита на локалното население од општините Струмица и Петрич од природни катастрофи и катастрофи предизвикани од човекот’’ финансиран од ЕУ.
,,Сведоци сме дека во последните децении се повеќе ги чувствуваме негативните последици од климатските промени врз животната средина. Општина Струмица се соочува со сериозни предизвици за прилагодување и ублажување на последиците врз природата, но и човековото здравје и безбедноста. Во услови на отежнато справување со природни непогоди, ја препознавме потребата од соодветно институционално опремување, подигање на свеста кај луѓето и јакнење на капацитетите на општината и Територијалната професионална противпожарна единица при општина Струмица’’, рече Јаневски
Возилото со два модула за поплави и шумски пожари би требало да чини околу 120 илјади евра. При интервенции за поплави истото ќе биде опремено со генератор за електрична енергија, подвижен осветлувачки јарбол, потопна и пливачка водна пумпа но и пумпа за отпад, чамец на надувување, пливачко јаже а ќе има и елеци за спасување, одела, црева, светилки. Кога ќе станува збор за реакција при шумски пожари возилото ќе има систем за гасење со екстремно висок притисок, преносна пумпа за вода, моторна пила, заштитни одела, чизми и противпожарни палки.
Проектот што Струмица го реализира со Петрич Бугарија чини околу 400 илјади евра обезбедени од ЕУ а освен набавка на возила односно модуларни системи за реакција, се планираат спроведување обуки за користење на опремата, вмрежување и размена на искуства во областа на превенција на ризик и заштита на населението во кризни ситуации а ќе биде и изработена едукативна книга за реакција во кризни ситуации наменета за основци.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
