Здружението за медиумска писменост „Медија Флеш“-Струмица продолжи со реализирање на проектот „Со медиумска писменост до борба против говор на омраза“, во средните општински училишта. Вчера проектот, кој е финансиран од Општина Струмица, преку интерактивен пристап беше промовиран пред ученици од четврта година во СОУ „Димитар Влахов“ на час по македонски јазик и литература, каде заедно со нивната професорка Олгица Хаџиева разговаравме за медиумската писменост и говорот на омраза.
Пред учениците за медиумската писменост и говорот на омраза зборува новинарот Ване Трајков, координаторот на проектот Ристо Тасев и асистентот Веле Појразовски. Учениците активно се вклучија со свои размислувања за медиумската писменост и говорот на омраза и искажаа голем интерес за оваа област, за која сметат дека почесто треба да биде претставувана пред нив преку најразлични форми, но истакнаа дека им треба повеќе едукација за распознавање на лажните вести и говорот на омраза.
На учениците им беше понудено да се вклучат во проектот преку пишување вести од најразлични области кои ќе се објавуваат на порталот „Југоинфо“ и на „Експрес Радио“.
Претставувањето на проектот ќе продолжи се до неговото завршување, а ќе биде организирана и трибина на која експерти од областа на медиумската писменост ќе зборуваат на оваа тема. Со оваа и со сите досегашни активности придонесуваме за едуцирање на 100 средношколци за штетното влијание од медиумски манипулации, кои може да доведат до говор на омраза и криминал од омраза, а едукацијата ќе ја вршат експерти од оваа област и искусни новинари.
Преку реализирање на проектот „ Со медиумска писменост до борба против говор на омраза“, сакаме да ја зголемиме свеста на младите во општина Струмица за критичко размислување преку мотивација за креирање на сопствен став и одговорно изјаснување во јавноста, со користење на аргументи и компетентност, препознавање лажна вест и борба против говор на омраза.
Генерална цел ни е создавање на мрежа од ученици, родители, професори по македонски јазик и литература, социологија, информатика, етика, граѓанска култура, ликовна уметност, педагогија, општински и државни просветни инспектори, новинари и медиуми, граѓански организации за борба против лажни вести и манипулации како и за градење на критичка мисла.
Промоцијата на проектот во СОУ „Димитар Влахов“ се одржа со целосно почитување на мерките за заштита од Ковид-19.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
