Веќе пет години волонтерството е неизоставен дел од животот на Елена Георгиевска од Струмица. Од млад волонтер, годинава ја презеде улогата на дисеминатор во програмата ,, Црвен крст во акција , Промоција на хумани вредности,, пренесувајќи го своето искуство на новата генерација волонтери. Заедно со нив учествуваше во подготовката и реализацијата на малите ПХВ проекти преку кои младите своите идеи ги претвораат во конкретни активности од корист за заедницата.
Да се помогне некому, да се разубави нечие секојдневие, да се поттикне солидарноста или преку уметност да се испрати порака за заедништво , тоа беше заедничката цел на петте мали ПХВ-проекти што годинава ги реализираа младите волонтери на црвениот крст во Струмица . Работејќи во тимови, тие ги препознаваа потребите во својата средина и преку различни хуманитарни, едукативни и креативни активности понудија конкретна поддршка онаму каде што беше најпотребна.
Елена вели дека најголемата вредност на ПХВ проектите е што им овозможуваат на младите да покажат дека возраста не е пречка за општествен ангажман. Напротив, со својата енергија, идеи и хуманост тие можат да направат вистинска разлика и да ги мотивираат и другите да се вклучат во вакви иницијативи.
Меѓу младите што годинава имаа поодговорна улога во ПХВ програмата беше и Радица Минкова. Од волонтер прерасна во мини ментор, водејќи една од групите во реализацијата на интеркултурен проект што обедини ученици од трето одделение од две основни училишта во Струмица. Преку заеднички активности децата имаа можност подобро да се запознаат, да стекнат нови пријателства и да испратат порака дека верската и етничката припадност не треба да бидат пречка за дружење, соработка и меѓусебно почитување.
Идејата за проектот произлегла од секојдневните ситуации што младите ги забележуваат во својата околина. Шестмината волонтери од тимот препознале дека предрасудите и стереотипите поврзани со етничката и верската припадност сe уште се присутни па одлучиле токму преку дружење и заеднички активности со најмладите да придонесат за нивно надминување уште од најрана возраст.
За Борис Тасовски волонтерството не е само начин квалитетно да се помине слободното време, туку можност да се помогне таму каде што е најпотребно. Вели дека чувството кога ќе измамиш насмевка или ќе му го олесниш секојдневието на некого е најголемата награда, а да се биде волонтер е вистинска привилегија.
Повеќе од 20 години програмата ,,Црвен крст во акција – промоција на хумани вредности,, создава нови генерации млади волонтери низ целата држава. Само годинава беа реализирани 195 мали ПХВ проекти преку кои стотици млади покажаа дека хуманоста не се мери со големината на делото туку со желбата да се помогне и да се направи позитивна промена во заедницата. (З.Ѓорѓиев)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
