ЗПСК Кожуф Гевгелија е здружение на граѓани, формирано во далечната 1952 година како Планинарско Друштво Кожуф, но од 2018 година е пререгистрирано и усогласено со законските одредби од Законот за спорт и актите на ФПСМ и го добива називот Здружение Планинарски Спортски Клуб КОЖУФ Гевгелија, со главна дејност – Дејности на спортските клубови. Како Здружение активно повеќе од 60 години ја развива и унапредува физичката култура, а особено планинарството како посебна форма на масовна физичка култура. Клубот кој брои околу 160 челнови лани реализираа дури 57 планинарски акции а со исто темпо продолжуваат и годинава. Ова беше причината да разговараме со претседателот Ристо Каркалашев и секреаторот Александра Караманова Алчинова кои во името на ЗПСК одговорија на прашањата на Дрнка.МК
Која е структурата на членовите на ЗПСК Кожуф Гевгелија и дали сите се активни членови
ЗПСК Кожуф Гевгелија : Структурата на Клубот е од сите возрасти, од нашите 158 члена, 43 се жени а 42 ца млади до 18 годишна возраст, нашиот Клуб е од отворен карактер секој член може да учествува на нашите акции кога сака и на која акција сак. Нормално секоја акција и не е за секој член, секоја акција си има своја тежина која бара соодветна физичка кондиција. Најстариот наш член е нашата долгогодишна членка Нада Марјановиќ со 73 години, а најмладиот член е Виктор Алчинов со 2 години.
Колку маршеви реализиравте лани и колку сте задоволни
ЗПСК Кожуф Гевгелија : Клубот 2020та година ја заврши со 58 реализирани акции, поради пандемијата која се појави во 2020та година решивме да се движиме во рамките на нашата Општина Гевгелија па така 95% од овие акции се реализирани на Кожуф планина. Од изминатата година неможеме многу да се пофалиме и да кажеме дека сме задоволни бидејќи најголемиот дел од акциите ни беа откажани поради пандемијата, но сепак може да се пофалиме со тоа што добар дел од акциите кои ги организиравме по Кожуф планина беа посетени од голем број наши членови и наши сограѓани па бројката на учесници на акциите се движеше од 30 па до 50 луѓе. Во 2020та поради пандемијата не организиравме акции надвор од државата, но сепак имавме учесник на една меѓународна акција, на оваа меѓународна акција нашиот Клуб го претставуваше Претседателот на ЗПСК КОЖУФ Гевгелија Ристо Каркалашев кој со уште седум мина планинари од Прилеп, Битола и Скопје ја претставуваа нашата држава во Турција каде се искачуваше врвот Ерџијес Даг 3917м. а оваа акција беше во целосна организација на Планинарскиот Спортски Клуб Балкан Белград.
Дали пандемијата ги отежна програмските активности или пак дојде до интерес за планинарење.
ЗПСК Кожуф Гевгелија :Нашиот Клуб секоја година во ноември месец носи календар на активности на Клубот за следната година, така беше донесен календарот и за 2020та год. Но откако се појави пандемијата ни ги поромети сите планови, беа откажани поголемите републички акции кои традиционално се организираат секоја година, ги откажавме нашите акции кои ни беа во план да ги организираме надвор од државата ( Грција, Бугарија, Србија, Босна ), беше откажана и Балканската Средба на Планинари која во 2020та требаше да се одржи во Ново Место Словенија а на која нашиот Клуб ја претставува нашата држава со уште два Клуба од Неготино и Тетово а оние републички акции на кои ние сме домаќини ги организиравме само за нашите членови. Поради пандемијата ни пропаднаа голем број предвидени активности, но таа ни донесе и нешто позитивно во нашиот Клуб, имено откако се појави пандемијата нашите сограѓани пројавија поголем интерес за прошетки во природа и планинарење, па така во 2020та година ЗПСК КОЖУФ Гевгелија го зголеми членсвото за нови 63 члена од сите возрасти.
Ве сметат за едно од најактивните – кој ги иницира маршевите
ЗПСК Кожуф Гевгелија : Иницијатори на планинарските активности во нашиот Клуб се нашите членови, кои имаат желба и потреба еднаш неделно да планинарат, така самите членови предлагаат акции и идеи па доколку се во можностите на Клубот тие се реализираат.
Оваа година поради пандемијата и трендовите на живеење кои акцентот го ставаат повеќе на здраво живеење, здрава храна и здрави навики интерес за планинарење пројавија многу наши сограѓани, но и граѓани на околните општини кои сакаат своето слободно време да го поминат во природа, пешачење и чист воздух. Па, како што се зголемуваше бројот на членови-почетници така беа иницирани и активностите и беа планирани акции како за почетници, така и за поискусните планинари од полесни до потешки.
Минатиот месец реализиравте 8 планинарски маршеви, што не е малку а имавте и прилично доста посети – на што се должи
ЗПСК Кожуф Гевгелија : Да, јануари месец реализиравме 8 планинарски акции, од кои 6 на Кожуф планина и по една на Плавуш во Валандово и Беласица. Месец јануари е зимски месец знаеме дека на повеќе планини пристапот е невозможен, но тоа не е така и на Кожуф планина посебно во пониските предели на Кожуф каде за среќа овој јануари имавме погодно време за планинарење, нашиот Клуб организира акции за сите возрасти и категории на граѓани според тоа изминатиов месец имавме акции од лесен карактер во пониските предели на Кожуф каде учествуваа по 20 до 30 па и повеќе членови на акција, но имавме и две искачувања на врвови на Кожуф во зимски услови а тоа беа врвовите Двете Уши 1766м. и Чичи Каја 1767м. каде на врвот Двете Уши 1766м. планинарите беа пречекани од силен ветар и температура од -20 степени, овие акции спаѓат во категоријата на тешки и екстремни акции за кои е потребна посебна планинарска опрема, но и добра психофизичка кондиција, и затоа на вакви акции учествуваат мал број на наши членови од 5 до 10 члена.
Каква е соработката со другите клубови
ЗПСК Кожуф Гевгелија : ЗПСК КОЖУФ Гевгелија има одлична соработка со сите планинарски Клубови од другите градови ширум нашата држава, а најголема соработка имаме со Клубовите од Струмица, Неготино, Кавадарци и Велес. Како член на Федерацијата за планинарство на Северна Македонија, ЗПСК Кожуф редовно учествува на годишни собранија, состаноци и средби на кои учествуваат сите Клубови од државата кои се членови на Федерацијата, каде редовно се разменуваат идеи, се продлабочува соработката и поддршката меѓу Клубовите и се работи на унапредување и ширење на планинарството како спорт во Р. Северна Македонија.
Што имате на програма за ова 2021 година
ЗПСК Кожуф Гевгелија : Поради пандемијата со Ковид 19 не донесовме календар на активности за 2021ва година, бидејќи не знаеме како ќе се одвива ситуацијата со пандемијата, па така на крајот на секој месец изготвуваме програма на активности за наредниот месец, иситите програми се флексибилни и се менуваат на предлог на нашите членови, а честопати се случува и да имаме повеќе акции во ист ден. Сепак, се надеваме дека оваа година ситуацијата ќе се нормализира и ќе може да ги реализираме сите планирани акции за оваа година и оние акции кои за жал во 2020 поради пандемијата не бевме во можност да ги реализираме.
Која е пораката што сакате да ја упатите до сите ?
ЗПСК Кожуф Гевгелија : Ги покануваме сите наши сограѓани да се приклучат во нашиот Планинарски Клуб посебно младите, бидејќи планинарењето е најздрав спорт. А придобивките од планинарењето се големи, од зајакнување на мускулите на целото тело, до подобрување на имуниот систем, позитивно делува на работата на срцето и уште многу други здравствени придобивки.
Ви помага ли некој за реализација на програмските активности
ЗПСК Кожуф Гевгелија : Ако е во поглед на срествата, финансирањето е од сопствени средства од членовите со наплаќање на годишна чланарина, и средства кои клубот ги добива на конкурс за поддршка на спортски клубови кој го распишува општина Гевгелија и на кој нашиот клуб редовно поднесува апликација, а последниве години добиваме одредена сума на финансиски средства и од Федерацијата за планинарство на Северна Македонија. Управувањето и раководењето со Клубот е организирано така што истиот има свои органи кои функционираат во поглед на утврдување и реализација на програмските активности и решавање по прашања кои се од клучно значење за функционирање на Клубот. Програмските активности се реализираат самостојно имајќи предвид фактот дека Клубот има лиценциран планинарски водич категорија А водење на групи во летни услови.
За активностите што ги има ЗПСК Кожуф Гевгелија можете да видете ТУКА
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
