Деновиве градинари од струмичкиот микро регион но и овоштари од регионот на Радовиш и Конче ја добија опремата за примена на современи агроеколошки мерки во своето производство. Станува збор за грантисти кои во рамките на проектот за ,,Управување со сливот на река Струмица“ ја поминаа обуката од третиот циклус и се стекнаа со право да добијат опрема во висина од 5 илјади евра. Со опремата фармерите од една страна треба да го осовременат своето земјоделско производство а од друга страна треба да го заштитат сливното подрачје на Струмица од загадување.
,,Во рамките на проектот „Управување со сливот на река Струмица“, градинари и овоштари, добитници на опрема за воведување на современи агроеколошки мерки од третиот циклус на обуки, денес имаа можност да подигнат дел од опремата и тоа електрични ножици, меѓуредни фрези, тракторки фрези, атомизери и друго. Висината на еден грант изнесува 5.000 евра, а во овој циклус преку учество во специјализирани обуки и тестирање избрани се 50 грантисти од кои 20 овоштари и 30 градинари’’, објавија на својата ФБ страна Центарот за развој на Југоисточниот плански регион
Инаку проектот „Управување со сливот на река Струмица“ го спроведува Програмата за развој на Обединетите нации (УНДП) во партнерство со Центарот за развој на Југоисточниот плански регион, општините од сливот на реката Струмица и други релевантни институции, а е финансиран од Швајцарската агенција за развој и соработка.
Досега преку ова програма на УНДП односно од двата објавени повика околу 80 градинари и овоштари од Струмица и Радовиш добија опрема и матријали со кои ќе применуваат агроеколошки мерки за поквалитетно земјоделско производство.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
