Постот дезинформира дека НАТО ја турка Украина да се бори до последниот Украинец. Ова е потценувачки наратив за илјадниците војници во Украина, како и за патриотските и одбранбени дејства коишто тие ги спроведуваат бранејќи се од руската агресија. Не е точно ниту дека снемало мажи, па Зеленски „испраќа жени да бидат убивани на фронтот“. Жените одат доброволно во служба и нивниот број по воената инвазија од Русија врз Украина е зголемен
Рецензираме пост објавен на социјалната мрежа Фејсбук, во кој се вели:
Знаеме дека НАТО го турка Киев „да се бори до последниот Украинец“. Дали сега им снема мажи? Најновиот дијамант на Зеленски: испраќање млади жени во рововите на првите борбени линии – за да бидат пукани, а можеби и убиени, или можеби тоа е само за зајакнување на моралот?
Потоа се споделува видеоматеријал на кој жени во автобус, облечени во војнички униформи со украинското знаме, пејат песна. Во постот е споделена и дезинформацијата дека НАТО го турка Киев да се бори до последниот Украинец.
Всушност, не е првпат ова да биде кажано. Такво нешто, на пример, пред неколку месеци (10.08.20220 кажа Сергеј Киријенко, висок политички функционер во Русија. Оваа реторика е официјално ширена од страна на политичари во Русија, вклучително и од самиот Владимир Путин во обид да се најде оправдување за руската воена агресија.
НАТО не е страна во конфликтот и не ја турна Украина да се бори
Украина беше нападната од страна на Русија на 24 февруари 2022 година. Бруталната инвазија на Русија ја предизвика најголемата бегалска криза во Европа после Втората светска војна, 8 милиони Украинци во мај 2022 година беа внатрешнораселени лица, а дотогаш 8 милиони ја имаа напуштено државата .
На воената инвазија ѝ претходеше поставување руски воени трупи на границата меѓу Русија и Украина и на границата меѓу Русија и Белорусија (кое почна на почетокот на 2021 година), како и барање од Русија законски да ѝ се забрани на Украина да се приклучи кон НАТО. Во деновите пред инвазијата Русија ги призна самопрогласената Доњецка народна република и Луганска народна република, по што следуваше инвазија на руските вооружени сили во Донбас во Источна Украина. Следниот ден Советот на Руската федерација изгласа овластување на претседателот на државата за употреба на воена сила надвор од границите на Руската Федерација.
Русија ја почна војната, Украина се брани
НАТО е одбранбена алијанса со цел да ги заштити своите членови. НАТО, според официјалните политики, не бара конфронтација и не е закана за Руската Федерација. НАТО не направи воена инвазија во Грузија, ниту во Украина. Тоа го стори Русија. НАТО постојано и јавно последните 30 години ѝ се обраќа на Русија.
Заедно работевме на борба против тероризмот и дрогата, дури и во периодот на проширувањата на НАТО. Но, во 2014 година, како одговор на руските агресивни акции против Украина, НАТО ја суспендираше практичната коопеација со Русија. Не бараме конфронтација, но не можеме да го игнорираме тоа што Русија ги крши интернационалните правила, поткопувајќи ја нашата стабилност и безбедност, стои на официјалната страница на НАТО.
Како одговор на руската употреба на воена сила против Украина, НАТО испрати четири мултинационални групи во Балтичките држави и Полска во 2016 година. Пред руското илегално присвојување на Крим немаше трупи на НАТО во источниот дел на Алијансата.
Како одговор на руската инвазија на Украина во 2022 година, НАТО значајно ја подобри одбранбената позиција вклучувајќи 4 нови групи во источниот дел од Алијансата. На НАТО самитот во Мадрид, сојузниците се согласија дека Русија е најзначајната и најдиректна закана за нивната безбедност и за мирот и стабилноста во евроатлантската област. Исто така, сојузниците се согласија да ја зајакнат позицијата на НАТО. Но, сојузниците и понатаму покажуваат отвореност да имаат отворени канали на комуникација со Москва за да превенираат ескалации.
Проширувањето на НАТО не е закана за Русија
НАТО е одбранбена алијанса со цел да ги заштити земјите членки. Секоја земја што се приклучува во НАТО се придржува до нејзините принципи и политики. Тоа ја вклучува и заложбата дека НАТО не бара конфронтација и не претставува закана за Русија, која што беше потврдена и на самитот во Брисел.
Проширувањето на НАТО не е насочено против Русија
Секоја суверена нација има право да ги избере своите аранжмани за безбедност. Ова е фундаментален принцип на европската безбедност, кон кој се има приклучено и Русија и треба да го почитува. Всушност, после Студената војна, Русија се обрза да гради инклузивна европска безбедносна инфраструктура, вклучително и со Повелбата од Париз, формирањето на ОБСЕ, креирањето на Евроатлантскиот партнерски совет, пишува на сајтот на НАТО.
НАТО никогаш не ѝ вети на Русија дека нема да се проширува после студената војна. Вратата на НАТО е отворена за нови членови од самото формирање во 1949 година и тоа никогаш се нема променето. Секоја европска земја која е во позиција дополнително да ги продлабочи принципите на Алијансата и да придонесе за сигурноста може да аплицира за членство.
Украина и Грузија имаат право да одберат кои ќе бидат нивни сојузници и Русија нема право да го диктира тој избор. Ги отфрламе сите идеи за кругови на влијание во Европа, тие се дел од историјата и таму треба да останат, велат од НАТО.
Инфраструктурата на НАТО надвор од териториите на сојузниците е ограничена на територии каде сојузниците имаат свои операции. Така НАТО има објекти во Косово, за мировната мисија на КФОР. НАТО има цивилни канцеларии во партнерски држави како Грузија, Молдавија, Украина и не може тие да се сметаат за воени бази.
НАТО не е во војна со Русија во Украина
НЕ сме во војна со Русија и не сакаме конфронтација. Тоа што го прави НАТО е поддршка за Украина во нејзиното право на самоодбрана како што е наведено во Повелбата на ОН. Изминатите месци преземавме строго дефанзивни мерки за да го засилиме присуството на НАТО трупи во источниот дел од Алијансата. Ова осигурува дека нема да има простор за недоразбирање во Москва, за нашата подготвеност да ги заштитиме нашите сојузници. Нашата главна задача е да ги задржиме безбедни сојузниците. Имаме одговорност да се осигураме дека конфликтот нема да ексалира и да се прошири надвор од Украина зашто тоа би било уште поопасно, пишува на сајтот НАТО каде дебанкираат митови и нудат факти.
Што се однесува на жените во украинската армија, тие доброволно пристапуваат кон службата за одбрана на својата земја од руската агресија. Украинската армија има голем број на жени во своите редови и тие самите одлучуваат да одат во служба.
Во септември 2022 година, Алџезира објави дека 50 илјади жени служат во украинските вооружени сили во различни улоги.
Од почетокот на руската инвазија врз Украина, бројот на жени кои своеволно се приклучија кон украинската војска порасна. Има околу 50 илјади жени кои служат од кои 10 илјади се на фронтот или на позиции кои што може да ги испратат на фронтот. Пред инвазијата во војската имаше 32 илјади жени. Воената служба за жените во Украина е доброволна, пишува Алџезира.
Жените што се медицински професионалци мора да се регистрираат, со што за нив се отвора можноста од листата да бидат испратени во служба. Значи, самата регистрација не значи дека тие ќе бидат испратени на фронтот. За сите други одењето во војска е доброволно.
Поради сите горенаведени факти, постот што го рецензираме го оценуваме како невистинит. Не е точно дека НАТО ја турка Украина да се бори до последниот Украинец. Ова е потценувачки наратив за илјадниците војници во Украина, како и за патриотските и одбранбени дејства коишто тие ги спроведуваат бранејќи се од руската агресија. Не е точно ниту дека снемало мажи, па Зеленски „испраќа жени да бидат убивани на фронтот“. Жените одат доброволно во служба и нивниот број по воената инвазија од Русија врз Украина е зголемен.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
