Вкупно 150 граѓани од Струмица и регионот учествуваа во националната хуманитарна иницијатива „Сите за Кочани – Трчаме заедно“ по струмичките улици – трка шта ја организираше Делегацијата на Европската Унија и мрежата на Јуроп хаус со поддршка од амбасадите на земјите-членки на ЕУ. Целта на настанот беше преку трчање и симболични котизации да се обезбеди поддршка за настраданите од трагичниот настан во Кочани, средства кои понатаму ќе се распределени преку Црвениот крст.
Во трката учествуваше и трчаше и заменик амбасадорката на Романија, г-ѓа Јоана-Вероника Чиолка, додека со своето присуство и поддршка на настанот учествуваше и амбасадорката на Грција, г-ѓа Софија Филипиду. Иницијативата се организираше истовремено во седум града низ државата – Скопје, Битола, Струмица, Велес, Струга, Крива Паланка и Тетово
Во машка категорија, првото место симболично го поделија Столе Ангеловски, Михаил Ников и Горан Стојанов, кои финишираа заедно во солидарност, со време од 19 минути и 30 секунди – вистинска слика на духот на оваа трка. Во женска категорија, првото место го освои тркачката со реден број 1, Даниела Велинска (22:55), второто место ѝ припадна на Марија Гинов (23:50), додека третото место го освои 10-годишната Викторија Стоева со време од 24 минути и 30 секунди.
Организаторите од Јуроп хаус Струмица изразуваат благодарност до сите граѓани, спортисти, рекреативци и организации кои несебично се приклучија на оваа трка и со своето присуство испратија силна порака на солидарност. Посебна благодарност упатија до институциите и партнерите кои овозможија настанот да се реализира безбедно и успешно – Делегацијата на Европската Унија како и Амбасадите на земјите членки на ЕУ, Црвениот крст, Општина Струмица, СВР Струмица, ЈЗУ Здравствен Дом Струмица, ЈПКД Комуналец Струмица, Територијалната противпожарна единица и СОУУД „Димитар Влахов“.
фото: Јуроп хаус Струмица
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
