Центарот за развој на Југоисточниот плански регион наредниов период ќе ги опремува Дневните Центри за лица со посебни потреби во Струмица, Гевгелија, Валандово и Радовиш се со цел да се подобрат условите за престој на лицата и нивна професионална ориентација и рекреација. Станува збор за проект што го финансира Швајцарската агенција за развој и соработка и Министерството за локална самоуправа во висина од 2 милиони и 170 илјади денари во рамките на проектот ,, Создавање на услови за поголема социјална инклузија на лицата со посебни потреби во Југоисточниот плански регион“
Проектот предвидува Дневните Центри за лица со телесна или ментална попреченост во Струмица и Гевгелија кои функционираат во рамките на ЈУ Меѓуопштински Центри за социјална работа во овие градови, Дневниот центар за деца со посебни потреби во Валандово но и Центарот за поддршка на лицата со интелектуална попреченост ,,Порака’’ од Радовиш, да добијат опрема за професионална ориентација, психомоторен развој но и за достапност на лицата со попреченост до сите објекти.
Од таа причина Центар за развој на Југоисточниот плански регион веќе склучи договор со Центарот за ортотика и протетика ,,Славеј,, од Скопје за набавка на три електромоторни транспортери за инвалдиска количка (гасеничари) и три трицикли во висина од 750 илјади денари. Дневните Центри во Струмица, Гевгелија ќе добијат по еден гасеничар и еден трицикл, Центарот во Валандово гасеничар додека Центарот во Радовиш трицикл.
Паралелно за Дневните центри се планира да бидат набавени и опрема за професионална ориентација како сито печатар за печатење на хартија и ткаенина, грнчарско колце за изработка на глинени суровини, разбој за ткаење за изработка на ткаеници од остатоци од конфекциски текстил, силиконски модли за изработка на сувенири но и принтери во боја за печатење на рециклирана хартија.
Во рамките на проектот се планира и набавка на спортски реквизити како Бочија сет, кош, ролер слајд, лулашки, базен со топки, карпа-алпинистички ѕид и опрема за спортски активности.
,, Целта на овој проект е збогатување на секојдневните активности и благосостојба на лицата со посебни потреби во регионот преку воведување рекреативни, културни и професионално ориентирани реквизити и опрема за достапност. На тој начин ќе се зајакне самодовербата кај лицата со посебни потреби но и капацитетот на Дневните Центри преку усовјување на нови вештини за професионална ориентација и спорт а на тој начин и социјализирање и инклузија на лицата со посебни потреби нивно професионално оспособување преку користење на набавената опрема,, информираа од Центарот за развој на Југоисточниот плански регион
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
