Актуелниот македонски одбојкарски шампион „Струмица Никоб“ ќе добива поддршка од полскиот гигант „Јастржебски Вегиел“ откако викендов претседателот на струмичкиот клуб Владо Милев но и на полскиот Адам Горол склучија договор за соработка. Договорот предвидува поддршка и помош за работа со младите категории на одбојкари, доусовршување но и размена на тренери и играчи заеднички учества на турнири и кампови а секако и одигрување на пријателски натпревари.
,,За нас ова е одлична можност да учиме од најдобрите и се надевам дека оваа меѓусебна соработка ќе биде долгорочна.Ова е историски момент за одбојката во Струмица и Македонија. Ќе имаме комплетна поддршка во смисла на програма за работа со млади категории, размена на тренери и искуства, супервизија, доусовршување на нашите тренери, како и размена на играчи, заеднички учества на турнири и кампови, а секако и пријателски натпревари. Со еден збор, се што е поврзано со развојот на одбојката и кај нас и во Полска“, изјави Милев.
Како што објави двократниот шампион на Полска и освојувач на купот на оваа земја „Јастржебски Вегиел“на својата веб страна, целта на полско-македонската соработка е размена на играчи, организирање на тренинг кампови и споделување на искуства во однос на тренинзите.
Двајцата претседатели веќе се договориле дека одбојкарски таленти од Академијата на полскиот клуб ќе престојуваат во Македонија во јуни годинава, додека младите таленти од ОК „Струмица Никоб“ ќе бидат во Јастржебие – Здрој во декември годинава.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
