Вкупно деведесеттина поранешни ученици во Струмичката гимназија кои во изминатите девет години беа дел од Новогодишниот-Божиќен концерт и сегашни средношколци, членови на хорот на училиштето СОУ „Јане Сандански“ утревечер (недела 5.01) во Центарот за култура во Струмица ќе го оддржат 10-ти хуманитарен концерт за да помогнат некому. Станува збор за традиционален концерт каде младите од ова училиште пеат за да ја пренесат божиќната порака дека треба да се биде хуман и да се помагне некому.
Годинава концертот е насловен „Деценија“ каде поранешните и сегашни средношколци од ,,Јане Сандански’’ ќе отпеат песни за десетгодишниот јубилеј на овој музичко новогодишно божиќен спектакл, кој традиционално се оддржува во првата недела од Новата година. На програмата се два концерти во 18 и 20 часот за кои се бараше билет повеќе.
Парите од влезниците од овој концерт ќе бидат наменети за лекување на 21-годишниот Стојче Јовановски, а дел од нив за збогатување со инструменти на Кабинетот по музика во СОУ „Јане Сандански“.
Александра Јанева, Јовче Пандев, Ивана Василева, Ристе Гавровски, Ангела Илиева и други имиња кои се веќе професионално дел од македонската естрадна сцена, ќе пејат на овој концерт. Ќе има повеќе жанрови на музика, рок, поп, џез во неколку композиции, ќе има и познати македонски композиции кои веќе влегуваат во евергрин музиката.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
