Струмица идната година треба да добие Скејт парк откако деновиве беше потпишан договорот за изградба меѓу општината и фирмата ,,Планиметрика” од Струмица која го доби тендерот. Пешо Инженеринг, Џови Компани од Мокрино и Планиметрика од Струмица се јавија на распишаната јавна набавка за изградба на Скејт парк од страна на Општина Струмица, но на јавната аукција најниска цена достави токму Планиметрика. Паркот согласно барањата од Техничката спецификација, струмичката фирма ќе го гради за 6 153 963 денари со вклучен ДДВ или за точно 100 064 евра, кои според Договорот се обезбедени од Буџетот на општината за ова година.
Скејт паркот треба да биде на површина од 624 квадратни метри и тоа на катастарската парцела 492/1 Струмица или во дворот на кругот на Домот на АРМ. Согласно потпишаниот Договор градежните работи треба да завршат во рок од 6 месеци од денот на воведување на фирмата во работа. Изведувачот ќе мора паркот да го изведе согласно основниот проект изработен од Архитектон Дизајн од Битола при што сите спортско рекреативни справи поставени на теренот да ги исполнуваат сите барања во врска со безбедната употреба.
Изградба на Скејт паркот во кругот на АРМ во Струмица, најави градоначалникот Костадин Костадинов уште во мај годинава кога се градеше повеќенаменското игралиште. Паркот треба да биде на местото каде беше досега Фитнес зона како донација од Пивара.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
