Здружението за медиумска писменост „Медија Флеш“-Струмица почна со претставување на проектот „Со медиумска писменост до борба против говор на омраза“, во средните општински училишта.Вчера проектот, кој е финансиран од Општина Струмица, преку интерактивен пристап беше промовиран пред ученици од трета година во СОУ „Јане Сандански“ на час по македонски јазик и литература, каде заедно со нивната професорка Катерина Ќосева разговаравме за медиумската писменост и говорот на омраза.
Учениците активно се вклучија со свои размислувања за медиумската писменост и говорот на омраза и искажаа голем интерес за оваа област, за која сметат дека почесто треба да биде претставувана пред нив преку најразлични форми, но и беа самокритични дека им треба повеќе едукација за распознавање на лажните вести и говорот на омраза. Заеднички е договорено учениците да се вклучат во проектот преку пишување вести од најразлични области кои ќе се објавуваат на порталот „Југоинфо“ и на „Експрес Радио“.
Претставувањето на проектот ќе продолжи во наредните денови и во другите средни училишта во општината и притоа планирано е едуцирање на 100 средношколци за штетното влијание од медиумски манипулации, кои може да доведат до говор на омраза и криминал од омраза, а едукацијата ќе ја вршат експерти од оваа област и искусни новинари.
Преку реализирање на проектот „ Со медиумска писменост до борба против говор на омраза“, сакаме да ја зголемиме свеста на младите во општина Струмица за критичко размислување преку мотивација за креирање на сопствен став и одговорно изјаснување во јавноста, со користење на аргументи и компетентност, препознавање лажна вест и борба против говор на омраза.
Генерална цел ни е создавање на мрежа од ученици, родители, професори по македонски јазик и литература, социологија, информатика, етика, граѓанска култура, ликовна уметност, педагогија, општински и државни просветни инспектори, новинари и медиуми, граѓански организации за борба против лажни вести и манипулации како и за градење на критичка мисла.
Промоцијата на проектот во СОУ „Јане Сандански“ се одржа со целосно почитување на мерките за заштита од Ковид-19.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
