Двете лекарски екипи кои работеа со мобилната амбуланта во Општина Ново Село и пружаа примарна здравствена заштита, ги едуцираа жителите во општината за ковид-19 и последиците од ова заболување, но и за потребата од вакцинација против коронавирусот, вели д-р Митко Манчев, кој цели шест месеци, заедно со медицински сестри, патува по населените места во општината за да пружи примарна здравствена заштита. Според последните официјалните податоци од Министерството за здравство заклучно со август во струмичко со две дози биле вакцинирани околу 32 отсто од населението . Овој дел од државата е еден од водечките региони по бројот на новозаразени со ковид-19 во четвртиот бран од пандемијата, поради што лекарите апелираат на почитување на мерките, но и за вакцинирање со било која вакцина
Пишува: Ване Трајков
Во населените места од оваа погранична општина со соседна Бугарија, живеат претежно повозрасни лица со оглед на тоа што нивните семејства со години се иселени во странство. За било каков преглед тие мора да патуваат и по десетици километри за да добијат примарна здравствена заштита со што беа изложени на дополнителни трошоци.
Од таа причина, општинските власти на Ново Село на почетокот на оваа година со европски пари набавија мобилна амбуланта, која секојдневно посетуваше по неколку села и нудеше здравствени услуги. Лекарите, освен што вршеа превентивни прегледи, го едуцираа и месното население за пандемијата, за можните симптоми на заболувањето од корона вирус, за потребата од лекарски прегледи, но и потребата од вакцинација кај повозрасно население, особено со оглед на тоа што беа изложени на голем број дезинформации и се најлесна мета на оние кои шират дезинформации поврзани за пандемијата.
Ние стартувавме во февруари годинава, кога беше третиот бран на пандемијата, но сè уште немаше вакцини кај нас. Делевме совети на граѓаните за заштита, бидејќи станува збор за претежно стари лица, до кои тешко стасуваа информациите за ковид-19. Бидејќи секој ден бевме по населените места, им укажувавме за првите симптоми на болеста, за опасноста од вирусот, но и како да се заштитат. Со оглед дека бевме постојано со нив, стекнавме доверба кај жителите, како во подбеласичките, така и во подогражденските населени места, каде воопшто нема приватни здравствени ординации, рече д-р Манчев.
Повеќе од двојно прегледи од планираните
За шест месеци двете екипи направиле околу 1.330 лекарски прегледи, но и 70 домашни посети кај болни и изнемоштени лица. Претежно стари лица на кои тоа им била ретка можност да извршат превентивен здравствен преглед. Сите тие за време на пандемијата биле бомбардирани од информации и вести за пандемијата, но не од вистински и релевантни извори.
Беше планирано да направиме околу 600 прегледи заради пандемијата, но еве реализиравме околу 1.300. Работевме според сите протоколи за заштита, како од наша, така и од страна на пациентите. Она што беше најважно при нашите посети локалното население се едуцираше и добиваа совети од нас. Посебно последниов период. Ние активно учествуваме во едукацијата за имунизација. Укажувавме дека вакцините се безбедени и дека е потребно луѓето да се вакцинираат. Со оглед дека е старечко население кое се информира од нерелевантни извори, директно од нас добиваа насоки за вакцинацијата. Еве, гледаме дека при теренската вакцинација одзивот е доста голем во нашата општина и сметаме дека имаме придонес во целиот процес на имунизација, вели д-р Манчев.
Во општина Ново Село има 16 населени места. Иако според пописот од пред две децении има околу 11,5 илјади жители, се претпоставува дека бројката на население е преполовена заради иселувањето на младите, па по селата живеат само стари брачни другари.
Само во две села има приватни здравствени ординации со матични лекари, па жителите од планинските и поодалечените места на лекар одеа кога здравствената состојба ќе им се влоши. Од таа причина Општина Ново Село преку Програмата за прекугранича соработка со соседна Грција го реализираше проектот Мрежа за примарна здравствена заштита, преку кој беше набавена мобилната амбуланта со потребната медицинска опрема, каде лекари пружаа здравствени прегледи. Посетата по населените места беше искористена и за да се едуцира локлалното население за пандемијата со коронавирусот.
Дезинформациите за „чипирањето“ присутни секаде
Искрено, се појавија разни информации за ковид-19. Се говореше дека не постоел ваков вирус, дека било обичен грип, дека сè било лага, дека со вакцинацијата ќе нè чипираат. За сето тоа ги прашувавме лекарите кои ни доаѓаа. Тие ни објаснуваа дека станува збор за нов вирус, кој е доста подмолен и предизвикува низа компликации по човечкото здравје. Ни кажаа дека е пожелно да се вакцинираме и да се заштитиме, оти вакцинираните полесно ќе поминат. Дури не информираа и кога ќе има теренска вакцинација во нашето село и дека нема ништо страшно со вакцините, ни раскажа Мара Јанева од Коњарево.
Зголемена е просечната вакцинација
Од 20 август почна теренската вакцинација во општина Ново Село. Таму екипа на ЈЗУ „Здравствен Дом“ од Струмица врши вакцинација на локалното население со вакцините од „Синовак“ и „Фајзер“. Доктор Дајана Масинова од здравствениот дом во Струмица вели дека последниот месец интересот за вакцинација во оваа општина е значително зголемен. Освен на пунктовите каде се врши теренска вакцинација, добар дел од локалното население од Општина Ново Село доаѓа и во Струмица.
Дневно аплицираме од 650 до 800 вакцини. Во Општина Ново Село во моментов се врши теренска вакцинација со прва доза. Интересот е голем од тамошното население. Освен на пунктовите во населените места, дел од жителите доаѓаат и овде во пунктот за вакцинација при ООУ „Никола Вапцаров“ во Струмица. На ниво на ЈЗУ „Здравствен дом,“ заклучно со 30 август имаме вакцинирано 23.226 лица со прва доза и 15.771 лице со втора доза – ни изјави д-р Масинова.
Според последните официјалните податоци од Министерството за здравство заклучно со август во струмичко со две дози биле вакцинирани околу 32 отсто од населението . Овој дел од државата е еден од водечките региони по бројот на новозаразени со ковид-19 во четвртиот бран од пандемијата, поради што лекарите апелираат на почитување на мерките, но и за вакцинирање со било која вакцина.
Овој напис е изработен во рамките на Проектот за брзо справување со вакциналните дезинформации, имплементиран од Фондацијата Метаморфозис. Тој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
