Амбасадорката на Сојузна Република Германија во земјава, Петра Дрекслер, денеска престојува во работна посета на Струмица при што имаше средба со првиот човек на Општина Струмица Петар Јанков. На средбата како што соопштија од Општината се разговарало за функционирањето на локалната самоуправа, како и за активностите што се преземаат за јакнење на капацитетите на општинските служби и унапредување на квалитетот на живот на граѓаните.
„Градоначалникот Јанков ја истакна посветеноста на општината за натамошна соработка и размена на искуства, особено во делот на современите практики во локалното управување, поддршката на развојните проекти и креирањето нови можности за одржлив економски и општествен развој. Дополнително се разговараше и за можностите за продлабочување на соработката во економијата, трговијата, инвестициите и во други области што ќе придонесат за зајакнување на пријателските односи меѓу двете држави“, стои во информацијата од Општината.
Во рамки на посетата, амбасадорката Дрекслер и градоначалникот Јанков ќе присуствуваат и на свеченоста во СОУ „Јане Сандански“, каде ќе биде доделена плакета од Централната служба за училишта во странство (ZfA), како и ќе биде потпишан меморандум за понатамошна соработка во областа на германскиот јазик
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
