Фирмата „Евроградба Инженеринг“ од Владевци Општина Василево го доби тендерот за реконструкција на каналот за атмосферски води на дел од улицата „Крушевска Република„ – втора фаза. Станува збор за потегот од кружниот тек на ЕВН до улицата „Климент Охридски“ или транзитниот пат во должина од околу 573 метри.
Вкупно 6 фирми од Струмица и Скопје се јавиле на распишната јавна набавка на Општина Струмица а најниска цена понудила „Евроградба Инженеринг“ која со ДДВ изнесува 87.593.695 денари или околу 1 милиони и 424 илјади евра. Постигнатата цена е за 10 милиони пониска од проценетата за оваа јавна набавка.
Според Договорот, избраната фирма долниот дел од „поројот“ треба да го заврши во рок од две години но не покасно од 31.12. 2027 година. Рокот може да се продолжи доколку општината и операторот се договорат за продолжување заради одредени ситуации. Според проектот и долниот дел од поројот треба да биде затворен.
Од приложената техничка спецификација на договот, најмногу пари ќе одат за бетонските и армирачките работи или околу 46 милиони денари, додека за инсталација на надворешно осветлување ќе бидат потрошени околу 5 милиони денари.
Горниот дел од поројот на „Крушевска“ го работеше струмичката фирма Жикол која тендерот пред 5 години го доби за 578 илјади евра. Реконструкцијата се пролонгираше заради одредени непредвидени ситуации со подземната инсталација и горниот дел на „Крушевска“ стана шеталиште.
Инаку средствата за реализација на втората фаза од поројот на Крушевска во Струмица се обезбедени од Министерството за животна средина и просторно планирање за што лани во јули Општина Струмица потпиша Договор за користење на финансиски средства. ( В.Трајков/ фото Дрнка.МК)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
