Пожарникари од Југоистокот но и од соседна Бугарија овие денови учествуваа во практичните обуки за гаснење шумски пожари и спасување на лица од природна катстрофа во рамките на проектот “Прекугранична соработка во справување со шумски пожари“ што го имплементира Центарот за развој на Југоисточниот плански регион со Асоцијацијата на југозападни општини од Бугарија. Станува збор за дел од модулите со кои пожарникарите треба да стекнат дополнително искуство и вештини како да дејствуваат во ситуации кога треба да се спречат последици од пожари и елементарни непогоди.
Најпрво симулираа гаснење на шумски пожар на планината Огражден при што користеа вода од браната Иловица. Струмичките пожарникари како домаќини на вежбата со опремата со која располагаат демонстрираа полнење на 10 тонски базен со помош на потопни пумпи, кој се користи при гаснење на големи шумски пожари во тешко пристапни места.
Паралелно пожарникарите од двата прекугранични региона на тренинг центарот во Струмица изведоа и вежба како да спасат животи при природни катастрофи односно земјотрес. Во рамките на модулите тие соработуваа и како да се спаси повредено лице во сообраќајка но и како да се спасат лица зафатени од шумски пожари.
Станува збор за 6 дводневни обуки, од кои 3 беа во Бугарија и 3 во Македонија. Истите се модерирани од страна на сертифицирани обучувачи од Националната Асоцијација на доброволците во Република Бугарија и Главната Дирекција за пожарна безбедност и заштита на населението. На обуките присуствуваа вкупно 64 учесници од кои 30 професионални пожарникари и доброволци се од Македонија.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
