Локалитетот Св. 40 кај Банско крие податоци за средновековната духовна традција на Струмица и регионот. Вака сметаат археолзоите од струмичкиот Завод и музеј кои во близина на темелите на истоимената Црква се пронајдени остатоци од римски објект датиран од помеѓу 2 и 3 век од новата ера.археолозите сметаат дека се работи за значајно откриетие кое покажува дека на овој простор имало активност и во римски период. Веднаш до римскиот објект се наоѓа и средновековната некропола во која годинава се откриени нови 18 погребувања.
,,Истражувачките работи во 2024 година се одвиваа на просторот северно од црквата. На овој простор по површината на земјата се надѕираа контури од објекти. По отстранувањето на горните површински хумусни слоеви, се пристапи со истражување на културните слоеви. На релативно мала длабочина се појавија остатоци од ѕид со обработени камења без користење на врзиво средство, кој се протега во правец југ – север. На северната страна ѕидот е пресечен со изградбата на црквата во крајот на XI односно почетокот на XII век. Овој ѕид највероја е остаток од постар објект изграден во римскиот период. Нашите претпостави одат во насока дека на овој простор во римскиот период егзистирала вила рустика, со истражувањата на културните слоеви беше откриена садова керамика од истиот период. Со минатогодишните археолошки истражувања на овој локалитет беше откриена римска монета на Марко Аурелиј (161-180), што несомнено е потврда за активноста на овој простор во римскиот период. На јужната страна овој објект се шири додека на западната затвара просторија. Дебелината на ѕидот изнесува 0,90 метри, висинската зачуваност е од 0,4 до 0,6 метри. Во средниот век објектот е пресечен со изградбата на црквата како и со вкопувањето гробните јами на средновековните погребувања во периодот од XII до XVI век,, соопштија од археолошкиот тим
Црквата посветена на Светите 40 маченици е откриена во 1984 година во минатиот век. После цели 40 години, лани беше извршена конзервација и реставрација на објектот со акцент на обнова и санирање на фугите на ѕидовите. Оваа црква е специфична и по нејзината форма бидејќи е една од ретките во Македонија која е градена во форма на слободен крст.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
