Место со огревни дрва, складот на ШС ,,Беласица’’ во Струмица стана плац на старо железо и хаварисани моторни возила. Станува збор за запленети возила со кои се вршел превозот на крадените дрва и повеќе од една деценија се складираат на плацот каде се ставаат едни врз други, оти место нема. Од ШС Беласица од Струмица велат дека за возилата никој не пројавува интерес па тие со години си стојат на плацот. Неофицијално има околу 1000 парчиња стари моторни возила, комбиња, приколки, камиони, трактори. Дел од нив функционални а најголемиот дел неупотребливи, испокршени.
,, Па со години никој не ги превзема од складот. Се што ќе се заплени од страна на шумочуварите од Беласица или од шумската полиција се носи овде. Претежно станува збор за стари возила со кои се вршело транспорт на крадени дрвја и при постапка сопствениците не плаќаат за да си ги повратат, па остануваат тука. Постојано притискаме оти нема место каде да ги складираме дрвата од нашата сеча. Донесена е одлука на Влада дека мора да се дислоцираат. Неодамна имавме состанок и одлучено е прво да се изврши попис и вештачење па да се утврди кои возила ќе одат како старо железо а кои за продажба оти овде има и трактори и камиони кои се функционални”, ни изјави Никола Ристов од ШС ,,Беласица’’ од Струмица
Ништо поразлична не е ситуацијата ниту со складовите за огревно дрво на подружниците на Македонски шуми и низ другите градови во државата. Според информациите, чистењето на плацевите од хаварисаните возила и старото железо ќе почне по претседателските избори.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
