Проектот зонско паркирање во Гевгелија предвидува да има вкупно 1007 паркинг места како во центарот така и по останатите улици сообраќајници кои ќе бидат опфатени со проектот. 20 паркинг места се предвидени за лица со инвалидитет и 4 за електрично напојување на возилата. Истите ќе бидат обележани и со поголема големина согласно законските норми а градот Гевгелија ќе биде поделен во три зони. Првата ќе биде ограничувачка А каде возилата може да бидат паркирани максимум два часа, втора зона жолта Б и трета зона зелена Ц. Ова било истакнато на синоќешната јавна презентација на овој проект кој беше најавен минатата година, објави општина Гевгелија на својата официјална веб страна.
,,Сегашната состојба со паркирањeто во центарот на градот предизвикува застој и хаос во сообраќајот, го оневозможува протекот на возила чии сопственици сакаат во центарот на градот да завршат одредена работа во институциите кои тука се лоцирани. Истовремено, го отежнуваат и пристапот на туристи кои секојдневно престојуваат во нашиот град. Оттука произлегува и потребата за изработка на Проектот за сообраќаен режим во градот, а во чии рамки е предвидено и зонско паркирање,, изјавил градоначалникот на Гевгелија Сашо Поцков на јавната презентација.
Советот на општина Гевгелија со посебна одлука ќе ги одредува цените за паркирање во втората и третата зона, како и условите за паркирање. Плаќањето ќе се врши електронски, но и преку посебни картички кои ќе им се продаваат на туристите, а супермаркетите, банките, стоматолошките ординации и други институции можат да закупат одделни паркинг-места,стои во информацијата од општината.
Присутните граѓани на јавната презентација ја поддржале Иницијативата за воведување на зонско паркирање, нагласувајќи дека неопходно е да се воведе ред во паркирањето, посебно во центарот на градот. Било оценето дека организирањето и спроведувањето на зонското паркирање најдобро е да се врши од страна на Јавно претпријатие.
Општина Гевгелија на својата веб страна ги објави границите на сите три зони, каде ќе има зонско паркирање на која ќе биде спроведена и јавна анкета, по што ќе бидат сумирани предлозите и сугестиите од граѓаните. Истите ќе ги разгледа најпрво Општинскиот совет за безбедност во сообраќајот а потоа и во Советот на општина Гевгелија кој треба да ја донесе конечната Одлука за операторот, цените и условите за зонско паркирање на одредените зони.
Фото Телевизија Нова
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
