Жителите од населеното место Сушица добија чиста и здрава вода за пиење откако општинските власти на Ново Село изградија нова и современа филтер станица. Станува збор за инвестиција вредна над 4 милиони денари. Како што кажа градоначалникот Божинов, новиот систем е целосно автоматизиран, ја контролира работата на пумпите, нивото на вода во резервоарот и овозможува оптимизирано трошење на вода. Со тоа како што подвлече значително ќе ја зголемува ефикасноста и стабилноста на водоснабдувањето во Сушица
,,Нашите сограѓани од селото Сушица кое е второ по големина населено место во нашата општина ќе пијат чиста и филтрирана вода при што ќе го нема манганот и ќе имаме здрави генерации. Како општина наследивме проблеми со ова станица но успеавме да го решиме. Сушица имаше децениски проблем со водата за пиење но сега тоа е минато. Не очекуваме проблем со водоснабдувањето на домаќинствата во Сушица “, кажа градоначалникот Ѓорге Божинов
Филтер станицата е поврзана со новиот водовод, кој неодамна беше пуштен во употреба, што дополнително го зголемува капацитетот на системот и овозможува сигурно и континуирано водоснабдување, без прекини или недостиг, дури и во периоди на зголемена потрошувачка. Сушица е второ по големина населено место во општина Ново Село, со 600 домаќинства и околу 1.000 жители. Просечното дневно водоснабдување обезбедено преку новата филтер станица има капацитет од 500 кубни метри на ден, што е доволно за редовните потреби на селото.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
