Во наредните две години Општина Василево заедно со Општина Кресна од Бугарија ќе го имплементираат проектот “Интеграција на креативен, дигитален, зелен и еко туризам за одржлив развој на територии и заедници во Кресна, Струмјани и Василево”. Освен овие две општини во проектот ќе бидат вклучени и здружението ,,Во фокус“ Струмјани, Лозарско-винското здружение ,,Керацуда“ од Кресна, фирмата Саси-Трејд од Струмица и здружението ,,Туристичка Асоцијација Синаница 2000“ од Кресна.
Како што соопштија од координативното тело кое е одговорно за одобрените преокти по приоритетот 3 „Интегриран развој на прекуграничниот регион“ на Програмата Interreg VI-A ИПА Бугарија – Македонија 2021-2027, вкупната вредност за проектот што ќе го имплементираат Кресна и Василево со партнерите изнесува 967.379,08 евра. Буџетот за македонските парнери изнесува околу 346 илјади евра од кои 302,3 илјади ќе бидат за општина Василево а околу 43,7 за ДТПУ Саси Трејд.
“Ќе се создаде мултифункционална сала преку реконструкција на стариот објект која ќе се користи како за културни претстави и прослави, така и за големи настани од различен карактер. Во културниот локалитет ќе биде отворен туристички информативен центар, кој ќе ги промовира туристичките можности во регионот, како и Музејска збирка која ќе ја претстави приказната на Мис Стон“, соопштија за Дрнка:МК од координативното тело за реализација на Програмата Interreg VI-A ИПА Бугарија – Северна Македонија 2021-2027
Дека ќе се реновира Домот на Културата во Градашорци, објави и градоначалникот на Василево Славе Андонов. Тој на ФБ напиша дека се обезбедени средства од Програмата за прекугранична соработка со Бугарија.
,,Реконструкцијата ќе опфати, реконструкција на кровот, поставување нова фасада, поставување на фотоволтаици, хортикултурно уредување на просторот, поставување на аудио техничка опрема и отворање на спомен соба на Мис Стон“, напиша градоначалникот на Василево Славе Андонов
Овој месец вклучените страни треба да го потпишат договорот со што се отвара можноста и за имплементација на проектот BGMK0200030 . Според планот, реализацијата на овој проект треба да се спроведе во наредните 24 месеци. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
