Насловот на текстот споделен во постот е невистинит. САД нема пратено војска да се бори во Украина. Наспроти содржината на текстот во која се зборува за починат доброволец од Америка, насловот сугерира за официјално постоење на американска војска во Украина, што е манипулација. На 12 февруари Пентагон им нареди на американските трупи стационирани во Украина да ја напуштат земјата поради тоа што имаше најави дека ќе се случи руската инвазија. Исто така, насловот лажно сугерира дека фотографијата прикажува „уништување на американската војска во Украина“, таа е стара 14 години, направена е во 2008 година
Рецензираме пост објавен на социјалната мрежа Фејсбук во кој се вели:
Уништена американската војска во Украина (ФОТО).
Во склоп на постот споделен е напис од МКД Прес, во кој доследно пренесено пишува:
Во Украина уништена е американската војска Дане Патриџ со назнака „Птица“.
Роден во Ајдахо пристигна во Украина на 27 април, учествуваше во битките кај Северодонецк. Пред една недела тој доби шрапнел во главата, падна во кома и набрзо почина. Американецот во родната држава Ајдахо на 3 октомври отишол со воен авион во торба за тело.
Насловот на текстот е невистинит. Америка нема пратено војска да се бори во Украина. Наспроти нејасната содржина на текстот во која се личи како да се зборува за починат доброволец од Америка, насловот сугерира за официјално постоење на американска војска во Украина, што е манипулација.
Американските воени сили не се испратени во Украина. Пентагон ги релоцираше членовите на Националната гарда уште во февруари, кога тие ги тренираа припадниците на украинската армија. На 12 февруари Пентагон им нареди на американските трупи стационирани во Украина да ја напуштат земјата поради тоа што имаше најави дека ќе се случи руската инвазија.
Во август годинава, неколку месеци по заминувањето на американските трупи од Украина, на социјалните мрежи почнаа да се шират дезинформации дека тие уште се таму. Гарон Гарн, портпарол на одделот за одбрана, за проверувачите на факти од Политифакт, изјави дека се работи за дезинформација и дека нема американски воени сили во Украина.
Во конкретниот случај, текстот во постот што го рецензираме се однесува на поединец, доброволец од САД.
Според напис на Дејли Бист, портпаролот на Стејт Департментот на 12 октомври потврдил дека државјанин на САД бил убиен додека се борел во Украина.
Првичните извештаи на социјалните мрежи го идентификуваат човекот како Дејн Партриџ воен ветеран од Ајдахо. Кога новинарите на Дејли Бист го прашале портпаролот на Стејт Департментот, тој не го потврдил идентитетот на загинатото лице, меѓутоа потврдил дека америакнски државјанин неодамна бил убиен во Донбас. Тој додал дека службеници од Стејт Департментот се во комуникација со семејството на загинатиот и дека поради почит, нема да се споделуваат повеќе детали за неговата смрт.
Дејли Бист пишува дека Партриџ на својот сопствен Фејсбук профил напишал дека летал за Полска преку Германија на 26 април барајќи донации за да купи униформи. На 27 април постирал дека се качува на автобус кон границата и дека повеќе нема да дава податоци поради безбедносни причини.
Следната објава на неговиот Фејсбук профил е од неговата сестра во вторникот (11 октомври) која напишала дека Дејн Партриџ е на апарати поради животозагрозувачки повреди додека служел во Украина.
Истиот ден, два часа подоцна, тоа таа информира дека нејзиниот брат починал:
Само што не информираа дека Дејн починал. Знам дека неговата душа пронајде мир. Секогаш сакаше да се шегува и понекогаш да води сериозни разговори. До последните денови остана верен на својата вера и духовни убедувања.
Дополнително збунувачки и манипулативно е тоа што постот што го рецензираме и во насловот на написот што е споделен, се вели: „Уништена американската војска во Украина (ФОТО)“, а на самата фотографија е прикажан војник пред авион. Кога ќе се пребара фотографијата на Гугл, се гледа дека таа е користена во различни контексти на повеќе сајтови како на пример тука, тука, и описот е „Воздухопловни сили на САД“. Фотографијата е стара 14 години, направена е 2008 година, што значи насловот лажно сугерира дека прикажува „уништување на американската војска во Украина“. Њујорк Тајмс веќе пишуваше за тоа дека САД одбива да прати трупи во Украина, па цивилни волонтери, потпомогнати со онлајн донации, сосема на своја рака одат да се борат во Украина. Таков е случајот и со загинатиот Дејн Патриџ.
Поради сите горенаведени факти, оценуваме дека не е вистина дека е уништена американска војска во Украина. Дополнително, фотографијата во склоп на текстот воопшто не го прикажува наводното „уништување” , туку потекнува уште од 2008 година.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
