Информацијата дека најмногу од пациентите примени на Инфективната клиника се со примени две дози вакцина, експресно ја демантираше Министерството за здравство. ТВ 24 која ја објави (дез)информацијата го пренесе демантот, посочувајќи дека била направена ненамерна грешка и ја повлече веста. Но и покрај тоа, оваа објава на Фејсбук го користи ваквиот пропуст на телевизијата и продолжува да ја шири неточната информација за да му наштети на процесот на имунизација
Анализираме пост на Фејсбук, кој користи веќе повлечена и демантирана информација на Телевизија 24 со цел да го оцрни процесот на вакцинација против ковид-19.
Пред само 10-тина минути на ТВ24 !!!
Најмногу од пациентите што се примени овде на инфективната клиника СЕ ПАЦИЕНТИ ШТО ПРИМИЛЕ ДВЕ ДОЗИ ВАКЦИНИ, а нема регистрирано пациенти што го прележале ковидот, па повторно да се заразат ?!? Само вие шибајте се !!!, се вели во Фејсбук објавата.
Точно е дека ТВ24 излезе со ваква информација, но истата беше повлечена откако пристигна демант од Министерството за здравство. Веста на ТВ 24 повеќе не може да се најде на нивниот сајт, за што реагираа и нивните читатели на Фејсбук.
Информацијата дека најмногу од пациентите примени на Инфективната клиника се пациенти со примени две дози вакцина, експресно ја демантираше Министерството за здравство.
Министерството за здравство ја демантира информацијата објавена во вестите на Телевизија 24 која се споделува на социјалните мрежи, каде се тврди дека на Инфективна клиника најголем број од хоспитализираните пациенти биле со примени две дози вакцина. Информацијата денеска не беше проверена во Министерството за здравство, ниту пак во КИБФС. Министерството за здравство тврди дека на Инфективната клиника во моментов се хоспитализирани 94 пациенти и само околу 10% се вакцинирани со две дози вакцини и истите се со полесна клиничка слика. Министерството за здравство стои на располагање на сите медиуми секој ден и апелира сите информации да ги проверуваат и да ја информираат јавноста вистинито и точно. Ваквите погрешни информации ја доведуваат јавноста во заблуда и создаваат страв кај граѓаните во однос на имунизацијата. Процесот на имунизација е многу важен, а медиумите се наш сојузник во борба со ковид пандемијата.
Демантот го пренесе и ТВ 24, нагласувајќи дека претходно пласираната информација била ненамерна.
Министерот за здравство, Венко Филипче, вчера во изјава за медиумите нагласи дека вакцинираните што се позитивни на ковид се со лесна клиничка слика и дека бројот на вакцинирани заболени и хоспитализирани е многу мал.
Десетина проценти од сите кои се дијагностицираат во текот на денот се вакцинирани. Исто така, десетина проценти од хоспитализираните се вакцинирани. Тоа што охрабрува е дека од вкупната бројка вакцинирани, која во текот на вчерашниот ден достигна 600.000 многу малку се дијагностицирани. Бројката се мери во промили 0,002, што значи дека главниот проблем е во бројот на граѓани кои не се вакцинирани. Воопшто немаме проблем со тие кои се вакцинирани и во другите земји заболуваат, меѓутоа за 20 пати е помал ризикот од смртен исход ако заболи некој кој е вакциниран, рече Филипче.
Од сето ова може да се заклучи дека информацијата оти најмногу од пациентите примени на Инфективната клиника се со примени две дози вакцина не е точна.
Се случува медиум да направи и грешка, а потоа да ја увиди грешката, да ја повлече неточната информција и да се извини. Сепак, ваквите грешки некои лица максимално ги користат за да шират дезинформации со кои можат да му наштетат на процесот на вакцинација против ковид-19.
Дека вакцините штитат од тешка клиничка слика и смртен исход потврдуваат многу лекари, како и Министерството за здравство од каде нагласуваат дека вакцинирани со две дози заболуваат, но нивниот број е многу мал. А, исто така, мал е и бројот на вакцинирани со две дози кои се хоспитализирани и истите се со полесна клиничка слика.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
