Место да почне да функционира за десетте општини од Jугоистокот, регионалното јавно претпријатие за заловување и третман на кучињата скитници ,,Астра Луна’’ ќе се ликвидира, а основачките права ќе се префрлат на општина Струмица. Ваква одлука донесе Советот на градоначалници од Jугоистокот кои се откажаа од регионално решавање на проблемот со уличите кучиња односно од проект на Центарот за развој на Југоисточниот плански регион кој обезбеди средства и изгради стационар во Струмица, набави возила за шинтерската служба а сличен стационар требаше да се гради и во Валандово.
„Сметавме дека целиот проект е неиздржан и нефункционален за регионално ниво. Одлучивме секоја општина преку Советите да донесе одлука да се ликвидира ова регионално јавно претпријатие за да можеме да го префрлиме на општина Струмица која изрази интерес да го преземе. За возврат, Струмица треба да ги поврати основачките влогови на останатите општини“, ни изјави Андон Сарамандов, претседател на Советот на Југоистoкот кој подвлече дека општините од Југоистокот и понатаму проблемот со кучињата скитници ќе го решаваат индивидуално со ангажирање на приватни фирми преку тендери.
Градоначалникот на Струмица Костадин Костадинов потврди дека како општина изразила подготвеност да ги презеде основачките права на регионалното ,,Астра Луна’’, а досегашните влогови преку Центарот за развој на Југоисточниот плански регион да ги врати на останатите општини.
„Сите општини од Југоистокот на наредните седници треба да донесат одлука за ликвидација на регионалното претпријатие Астра Луна, а ние да донесеме одлука за основање на наше општинско. Ова значи дека сами ќе го решаваме проблемот со кучињата скитници и се надевам дека во првите месеци од 2022 ќе отпочне со работа. Како градоначалник веќе имам планирано средства за таа намена во Буџетот на општината за идната година. Ќе настојуваме ова Јавно претпријатие да биде самоодржливо и да учествува на тендерите за заловување и хуман третман на кучињата во други општини“, вели градоначалникот на Струмица Костадинов.
Годишно, општините од југоистокот за решавање на проблемот со уличните кучиња трошат по околу 40-тина илјади евра. За оваа година општините Дојран , Гевгелија, Богданци и Валандово имаа склучено договори со фирмата ,,Анри Вет’’од Стојаково. Согласно потпишаните договори Гевгелија третманот на кучињата скитници ја чини 9.500 евра, Богданци 5.500, Валандово околу 4.800 и Дојран 2.500 евра.
Радовиш за ова намена во мај ја ангажираше фирмата ДПТУ ,,Ветеринарна станица’’ од Неготино за износ од 8.100 евра, додека Општина Струмица последна ваква набавка направила во јуни 2019 за период од една година за околу 13 илјади евра со кумановската ,,Тодор Велков’’.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
